రిలీజ్ డేట్ పేరుతో ఒత్తిడి చేస్తే కుదరదు.. నిర్మాతలకు సెన్సార్ బోర్డు స్ట్రాంగ్ వార్నింగ్

సినిమా విడుదల తేదీ దగ్గరపడుతోందని సెన్సార్ ప్రక్రియను వేగవంతం చేయాలని ఒత్తిడి చేసే నిర్మాతలకు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) గట్టి హెచ్చరిక జారీ చేసింది. విడుదల తేదీని ప్రకటించినంత మాత్రాన సెన్సార్ బోర్డు త్వరగా సర్టిఫికేషన్ ఇవ్వాల్సిన అవసరం లేదని స్పష్టం చేసింది. చట్టబద్ధమైన నిబంధనలు, నిర్ణీత గడువుల ప్రకారమే సినిమాలను పరిశీలిస్తామని వెల్లడించింది. ఈ మేరకు CBFC సీఈఓ రాజేంద్ర సింగ్ కఠిన మార్గదర్శకాలతో కూడిన అడ్వైజరీని విడుదల చేశారు.

సినిమా ఫైనల్ గ్రాఫిక్స్, బ్యాక్‌గ్రౌండ్ స్కోర్, క్రెడిట్స్, సౌండ్ మిక్సింగ్, సబ్‌టైటిల్స్ సహా అన్ని పోస్ట్ ప్రొడక్షన్ పనులు పూర్తయిన తర్వాతే సెన్సార్ సర్టిఫికేషన్ కోసం దరఖాస్తు చేసుకోవాలని బోర్డు సూచించింది. అసంపూర్తి వెర్షన్లు లేదా వర్క్ ఇన్ ప్రోగ్రెస్ కాపీలను సమర్పిస్తే దరఖాస్తులను తిరస్కరిస్తామని హెచ్చరించింది. అలాగే అప్లికేషన్‌లో సినిమా టైటిల్‌ను పేర్కొన్నంత మాత్రాన దానికి తుది ఆమోదం లభించినట్లు కాదని స్పష్టం చేసింది. అవసరమైతే టైటిల్‌లో మార్పులు సూచించే అధికారం ఎగ్జామినింగ్ కమిటీకి ఉంటుందని తెలిపింది. సినిమాటోగ్రాఫ్ చట్టం 1952, 2024 నిబంధనలకు అనుగుణంగా నిర్మాతలు తమ విడుదల తేదీకి ముందుగానే సెన్సార్‌కు దరఖాస్తు చేసుకోవాలని సూచించింది.