ఈపీఎఫ్‌వో చందాదారులకు గుడ్‌న్యూస్‌..

ఉద్యోగుల భవిష్య నిధి సంస్థ (ఈపీఎఫ్‌వో) చందాదారులకు సేవలను మరింత సులభతరం చేస్తూ వాట్సప్‌ ద్వారా పలు సదుపాయాలను అందుబాటులోకి తీసుకొచ్చింది. ఈపీఎఫ్‌వో 74వ వ్యవస్థాపక దినోత్సవం సందర్భంగా ఆదివారం కేంద్ర కార్మిక శాఖ మంత్రి మన్‌సుఖ్‌ మాండవీయ ఈ సేవలను ప్రారంభించారు. ఇకపై చందాదారులు వాట్సప్‌ ద్వారా తమ పీఎఫ్‌ బ్యాలెన్స్‌, చివరి ఐదు లావాదేవీలు, పాస్‌బుక్‌ వివరాలను తెలుసుకోవచ్చు. ప్రధానమంత్రి వికసిత్‌ భారత్‌ రోజ్‌గార్‌ యోజన (PMVBRY)కు సంబంధించిన సందేహాలు, సూచనలను కూడా పొందవచ్చు. ఇందుకోసం పీఎఫ్‌ ఖాతాకు అనుసంధానమైన మొబైల్‌ నంబర్‌ తప్పనిసరిగా ఉపయోగించాలి. మరోవైపు, అర్హులైన ఇన్‌ఆపరేటివ్‌ ఖాతాదారుల కోసం ఆటోమేటిక్‌ సెటిల్‌మెంట్‌ సదుపాయాన్ని కూడా తీసుకొచ్చారు. ఆధార్‌తో ధ్రువీకరించిన ఇన్‌ఆపరేటివ్‌ ఖాతాలో రూ.1,000 వరకు బ్యాలెన్స్‌ ఉంటే, ప్రత్యేకంగా క్లెయిమ్‌ దరఖాస్తు చేయాల్సిన అవసరం లేదు. ఈపీఎఫ్‌వో ఆధార్‌, బ్యాంకు ఖాతా వివరాలను పరిశీలించి నగదును నేరుగా లబ్ధిదారుల ఖాతాలో జమ చేస్తుంది. ఈ విధానం ద్వారా దాదాపు లక్ష ఖాతాల్లో రూ.5 కోట్ల వరకు జమ అయ్యే అవకాశం ఉందని అంచనా.