ఒకప్పుడు చైల్డ్ స్టార్.. ఇప్పుడు యష్ టాక్సిక్‌కు దర్శకురాలు

గీతూ మోహన్‌దాస్ కేవలం ఐదేళ్ల వయసులోనే 1986లో వచ్చిన మలయాళ చిత్రం ‘ఒన్ను ముతల్ పూజ్యం వరే’తో బాలనటిగా సినీ ప్రయాణాన్ని ప్రారంభించారు. ఈ చిత్రంలోని నటనకు కేరళ రాష్ట్ర అవార్డును అందుకున్నారు. 2000ల ప్రారంభంలో మలయాళ చిత్ర పరిశ్రమలో అగ్ర కథానాయికగా గుర్తింపు తెచ్చుకున్న ఆమె.. 2004లో వచ్చిన ‘అకాలే’ చిత్రంలో అద్భుత నటనకు ఉత్తమ నటి అవార్డును గెలుచుకున్నారు.

నటిగా తనకంటూ ప్రత్యేక గుర్తింపు తెచ్చుకున్న తర్వాత గీతూ మోహన్‌దాస్ దర్శకత్వం వైపు అడుగులు వేశారు. ‘లయర్స్ డైస్’, ‘మూతోన్’ వంటి స్వతంత్ర చిత్రాలతో విమర్శకుల ప్రశంసలు అందుకోవడంతో పాటు అవార్డులు కూడా సొంతం చేసుకున్నారు. ఇప్పుడు యష్ హీరోగా నటిస్తున్న భారీ గ్యాంగ్‌స్టర్ చిత్రం ‘టాక్సిక్’కు దర్శకత్వం వహిస్తూ తన కెరీర్‌లో మరో కీలక అడుగు వేస్తున్నారు. ఈ ప్రాజెక్ట్‌తో గీతూ మోహన్‌దాస్ మరింత విస్తృతమైన భారతీయ ప్రేక్షకులకు చేరువయ్యే అవకాశం ఉంది.