హారర్ థ్రిల్లర్ ‘అగధ’ ట్రైలర్‌కు రంగం సిద్ధం

దర్శకుడు ఎంఎస్ రాజు తెరకెక్కిస్తున్న డివైన్ మిస్టిక్ హారర్ థ్రిల్లర్ ‘అగధ’ విడుదలకు సిద్ధమవుతోంది. శ్రీ ఆది వరాహ ప్రొడక్షన్స్ బ్యానర్‌పై అజయ్ కేఆర్ సమర్పణలో, కాశి విశాలాక్షి బలుసు నిర్మిస్తున్న ఈ చిత్రంలో కామాక్షి భాస్కర్ల, శ్రవణ్ రెడ్డి, ఉల్కా గుప్తా, జోవికా విజయ్ కుమార్, భాను చందర్, వనిత విజయ్ కుమార్ తదితరులు కీలక పాత్రల్లో నటిస్తున్నారు. ఇప్పటికే విడుదలైన పోస్టర్లు, గ్లింప్స్, టీజర్లు సినిమాపై భారీ ఆసక్తిని పెంచాయి.

ఆగస్టు 14న ప్రపంచవ్యాప్తంగా విడుదల కానున్న ఈ సినిమా ప్రమోషన్లను చిత్ర బృందం వేగవంతం చేసింది. ఇందులో భాగంగా ‘అగధ’ ట్రైలర్‌ను ఆగస్టు 3న మధ్యాహ్నం 12 గంటలకు విడుదల చేయనున్నట్లు ప్రకటించారు. హారర్, అతీంద్రియ శక్తులు, పౌరాణిక అంశాల కలయికతో రూపొందిన ఈ చిత్రం ప్రేక్షకులకు సరికొత్త భయానక అనుభూతిని అందిస్తుందని చిత్ర యూనిట్ తెలిపింది. తాజాగా విడుదల చేసిన ప్రచార పోస్టర్‌లో దట్టమైన అడవి, పొగమంచు వాతావరణం, మంత్రదండంతో కనిపిస్తున్న వ్యక్తి లుక్ ప్రేక్షకుల్లో ఆసక్తిని రేకెత్తిస్తోంది.