జైలర్ 2: పూర్ణే హైలైట్!

సూపర్‌స్టార్ రజినీకాంత్ నటిస్తున్న జైలర్ 2 నుంచి మేకర్స్ అదిరిపోయే అప్డేట్ ఇచ్చారు. ఈ చిత్రంలోని తొలి పాట అలా బోలియోను తాజాగా విడుదల చేశారు. రాక్‌స్టార్ అనిరుధ్ రవిచందర్ మరోసారి హై ఎనర్జీ, ఆకట్టుకునే ట్యూన్‌తో పాటకు ప్రత్యేక ఆకర్షణ తీసుకొచ్చారు. విడుదలైన కొద్దిసేపటికే ఈ పాట సామాజిక మాధ్యమాల్లో ట్రెండింగ్‌గా మారి మంచి స్పందన అందుకుంది. అయితే పాటలో నటి పూర్ణ కనిపించిన తీరు ఇప్పుడు ప్రత్యేకంగా చర్చనీయాంశమైంది. సాధారణంగా రజినీకాంత్ పాటల్లో ఆయనపైనే ఎక్కువ దృష్టి ఉంటుంది. కానీ అలా బోలియోలో పూర్ణకు దర్శకుడు నెల్సన్ ఎక్కువ స్క్రీన్ టైమ్ ఇవ్వడం ఆసక్తి రేపుతోంది.

పూర్ణ ఎనర్జిటిక్ డాన్స్ మూవ్స్, గ్లామరస్ స్క్రీన్ ప్రెజెన్స్ పాటకు మరింత జోష్ తీసుకొచ్చాయి. రజినీకాంత్ స్క్రీన్ టైమ్‌ను పరిమితంగా ఉంచి పూర్ణకు ఎక్కువ ప్రాధాన్యం ఇవ్వడం ఇప్పుడు చిత్ర వర్గాల్లో చర్చగా మారింది. విజువల్స్, కొరియోగ్రఫీ, అనిరుధ్ సంగీతం కలిసి పాటను మరింత ఆకట్టుకునేలా చేశాయి. పాట విడుదలైన వెంటనే ప్రేక్షకుల నుంచి మంచి స్పందన రావడంతో సినిమాపై ఆసక్తి పెరుగుతోంది. ఈ ప్రెస్టీజియస్ చిత్రాన్ని అక్టోబర్ 15న గ్రాండ్‌గా విడుదల చేసేందుకు మేకర్స్ సిద్ధమవుతున్నారు. దీంతో జైలర్ 2పై అంచనాలు మరింత పెరుగుతున్నాయి.