సినీ పరిశ్రమకు జానీ మాస్టర్‌ కీలక విజ్ఞప్తి

తెలుగు ఫిలిం అండ్‌ టీవీ డ్యాన్సర్స్‌ అండ్‌ డ్యాన్స్‌ డైరెక్టర్స్‌ అసోసియేషన్‌ (టీఎఫ్‌టీడీడీఏ)లో ఇటీవల చోటుచేసుకున్న వివాదంపై కొరియోగ్రాఫర్‌ జానీ మాస్టర్‌ స్పందించారు. తెలిసీ తెలియక జరిగిన తప్పిదాలను పెద్ద మనసుతో మన్నించాలని సినీ పరిశ్రమను కోరారు. ఫిలిం ఛాంబర్‌, ఫెడరేషన్‌తో ఉన్న వివాదం పరిష్కారమైందని తెలిపారు. డ్యాన్సర్స్‌ అసోసియేషన్‌కు చిత్ర పరిశ్రమలోని అన్ని విభాగాలు సహకరించాలని విజ్ఞప్తి చేశారు.

డ్యాన్సర్లకు నిర్మాతలు చెల్లించే పూర్తి మొత్తాన్ని వారికి అందించడంలేదన్నదే తన ఆవేదన అని జానీ మాస్టర్‌ చెప్పారు. ఈ విషయంపైనే తాను మాట్లాడానని, తన అభిప్రాయాన్ని చిరంజీవితో పాటు పరిశ్రమలోని ఇతర పెద్దలు అర్థం చేసుకున్నారని తెలిపారు. సామరస్యపూర్వకంగా సమస్యను పరిష్కరించుకోవాలని వారు సూచించారని, వారి సూచనల మేరకు ముందుకు వెళ్తామని చెప్పారు. తన వ్యాఖ్యల్లో ఏదైనా తప్పు ఉంటే క్షమించాలని కోరారు. టీఎఫ్‌టీడీడీఏ ఉప ఎన్నికల్లో గెలిచిన సభ్యుల ప్రమాణ స్వీకార కార్యక్రమంలో ఆయన ఈ వ్యాఖ్యలు చేశారు. ఈ కార్యక్రమానికి పీపుల్స్‌ మీడియా అధినేత టి.జి.విశ్వప్రసాద్‌ హాజరయ్యారు.