ఫౌజీలో జయప్రద?

యంగ్ రెబల్ స్టార్ ప్రభాస్ హీరోగా దర్శకుడు హను రాఘవపూడి తెరకెక్కిస్తున్న పీరియాడిక్ వార్ డ్రామా ‘ఫౌజీ’పై మరో ఆసక్తికర ప్రచారం సినీ వర్గాల్లో చర్చనీయాంశంగా మారింది. ఈ సినిమాలో అలనాటి ప్రముఖ నటి జయప్రద కీలక పాత్రలో కనిపించనున్నారనే వార్తలు వినిపిస్తున్నాయి. ముఖ్యంగా ప్రభాస్‌కు తల్లి పాత్రలో ఆమె నటించే అవకాశం ఉందనే ప్రచారం అభిమానుల్లో ఆసక్తిని పెంచుతోంది. అయితే ఈ విషయంపై చిత్రబృందం నుంచి ఇప్పటివరకు ఎలాంటి అధికారిక ప్రకటన వెలువడలేదు.

ఇప్పటికే ఈ చిత్రంలో ప్రభాస్ సరసన ఇమాన్వి కథానాయికగా నటిస్తుండగా, ప్రముఖ నటుడు మిథున్ చక్రవర్తి కీలక పాత్రలో కనిపించనున్నారు. భారీ బడ్జెట్‌తో తెరకెక్కుతున్న ఈ సినిమాపై ప్రేక్షకుల్లో భారీ అంచనాలు నెలకొన్నాయి. ఆగస్టు 14న ప్రత్యేక గ్లింప్స్ విడుదల చేసే అవకాశం ఉందనే వార్తలు కూడా ప్రచారంలో ఉన్నాయి. జయప్రద పాత్రతో పాటు గ్లింప్స్‌పై కూడా త్వరలో చిత్రబృందం నుంచి అధికారిక సమాచారం వచ్చే అవకాశం ఉంది.