రచయిత, హీరో, దర్శకుడిగా కిరణ్ అబ్బవరం భారీ ప్రయోగం

యువ హీరోలు సాధారణంగా నటనపైనే దృష్టి సారిస్తున్న సమయంలో కిరణ్ అబ్బవరం మాత్రం మరింత సాహసోపేతమైన నిర్ణయం తీసుకున్నారు. తన తదుపరి చిత్రానికి పూర్తి సృజనాత్మక బాధ్యతలు స్వీకరిస్తూ, తొలిసారిగా దర్శకుడిగా మారుతున్నారు. అంతేకాకుండా ఈ చిత్రంలో హీరోగా నటించడంతో పాటు కథ, స్క్రీన్‌ప్లేను కూడా స్వయంగా రచించారు. దీంతో ఈ ప్రాజెక్ట్ ఆయన కెరీర్‌లో అత్యంత వ్యక్తిగతమైన, ప్రతిష్ఠాత్మకమైన చిత్రంగా నిలవనుంది.

విదేశీ పంపిణీదారుడు సుధాకర్ చాగంటి జాయ్ ఫిల్మ్స్ బ్యానర్‌పై నిర్మిస్తున్న ఈ చిత్రం ఆయన నిర్మాణ రంగ ప్రవేశానికి కూడా నాంది పలుకుతోంది. కుటుంబ భావోద్వేగాలు, యువతకు నచ్చే అంశాల సమ్మేళనంగా రూపొందనున్న ఈ సినిమా కిరణ్ అబ్బవరం కెరీర్‌లోనే అత్యధిక వ్యయంతో తెరకెక్కనున్న ప్రాజెక్ట్‌గా భావిస్తున్నారు. రేపు ఈ చిత్రాన్ని అధికారికంగా ప్రారంభించనుండగా, పలువురు ప్రముఖ నటీనటులు, సాంకేతిక నిపుణులతో చర్చలు కొనసాగుతున్నట్లు సమాచారం. త్వరలోనే పూర్తి వివరాలు వెల్లడయ్యే అవకాశం ఉంది.