మమ్ముట్టి తిలకంపై వివాదం.. విమర్శకులపై హరిశ్రీ యూసుఫ్ ఫైర్

మలయాళ మెగాస్టార్‌ మమ్ముట్టి నుదుటిపై తిలకం పెట్టుకున్న వీడియో ప్రస్తుతం సోషల్‌ మీడియాలో చర్చనీయాంశంగా మారింది. జాతీయ చలనచిత్ర అవార్డు అందుకునేందుకు గుజరాత్‌ వెళ్లిన మమ్ముట్టికి స్టాట్యూ ఆఫ్‌ యూనిటీ ప్రాంతంలో సంప్రదాయ పద్ధతిలో స్వాగతం పలికారు. పుష్పగుచ్ఛం అందించడంతో పాటు త్రివర్ణ శాలువాతో సత్కరించి, నుదుటిపై తిలకం దిద్దారు. మమ్ముట్టి చిరునవ్వుతో ఈ ఆతిథ్యాన్ని స్వీకరించగా.. ఆయన మతపరమైన గుర్తింపును ప్రస్తావిస్తూ కొందరు సోషల్‌ మీడియా యూజర్లు విమర్శలు చేశారు.

ఈ విమర్శలపై మలయాళ నటుడు, దర్శకుడు హరిశ్రీ యూసుఫ్‌ స్పందించారు. విమర్శకులు ‘బావిలో కప్పల్లా’ ఆలోచించవద్దని వ్యాఖ్యానిస్తూ.. ప్రతి విషయాన్ని కేవలం మతపరమైన కోణంలో చూడటం సరికాదని అన్నారు. అతిథులను స్థానిక సంప్రదాయం ప్రకారం తిలకంతో స్వాగతించడం సాధారణమేనని తెలిపారు. మతం మనుషుల మధ్య విభేదాలు సృష్టించేందుకు కాకుండా.. వారిని మంచి వ్యక్తులుగా తీర్చిదిద్దేందుకు ఉపయోగపడాలని హరిశ్రీ యూసుఫ్‌ పేర్కొన్నారు. ఇదిలా ఉండగా, భ్రమయుగం చిత్రంలోని నటనకు మమ్ముట్టి నాలుగో జాతీయ ఉత్తమ నటుడి పురస్కారాన్ని అందుకున్నారు.