నిజమైన ప్రేక్షకులకు ఎలాంటి ఇబ్బంది లేదన్న నాని...

నేచురల్ స్టార్ నాని నటించిన ది ప్యారడైజ్ సినిమాకు సంబంధించిన కోర్టు ఉత్తర్వులపై నెలకొన్న సందేహాలకు ఆయన స్పష్టత ఇచ్చారు. ముంబైలో జరిగిన ప్రీ-రిలీజ్ ఈవెంట్‌లో మాట్లాడిన నాని.. బెంగళూరు కోర్టు ఇచ్చిన మధ్యంతర ఉత్తర్వులు నిజమైన ప్రేక్షకుల అభిప్రాయాలను నియంత్రించేందుకు కాదని తెలిపారు. ఏఐ సాయంతో నకిలీ పోస్టులు, బాట్ల ద్వారా సినిమా గురించి తప్పుడు లేదా పరువు నష్టం కలిగించే ప్రచారం చేస్తున్న వారిపైనే ఈ న్యాయపరమైన చర్యలు ఉన్నాయని వివరించారు.

సినిమా టీజర్ విడుదలైన తర్వాత కొందరు కావాలనే ఏఐ టెక్నాలజీని ఉపయోగించి ఫేక్ పోస్టులు, అభ్యంతరకరమైన వ్యాఖ్యలను ప్రచారం చేస్తున్నారని నిర్మాతలు ఆరోపించారు. ఈ నేపథ్యంలో శ్రీ లక్ష్మీ వెంకటేశ్వర సినిమాస్ ఎల్ఎల్‌పీ బెంగళూరు సివిల్ అండ్ సెషన్స్ కోర్టును ఆశ్రయించగా, సెప్టెంబర్ 19న మధ్యంతర ఉత్తర్వులు వెలువడ్డాయి. అయితే సినిమా చూసిన తర్వాత ప్రేక్షకులు తమకు నచ్చిన విధంగా సమీక్షలు, విమర్శలు, అభిప్రాయాలను స్వేచ్ఛగా చెప్పవచ్చని నాని స్పష్టం చేశారు. శ్రీకాంత్ ఓదెల దర్శకత్వంలో తెరకెక్కిన ది ప్యారడైజ్ సెప్టెంబర్ 24న ప్రపంచవ్యాప్తంగా విడుదలైంది. ఇప్పటికే ప్రీమియర్ షోలు కూడా ప్రదర్శించారు.