మణిరత్నంతో పనిచేయడం నా జీవితకాల కల: నాని

ది ప్యారడైజ్ ప్రమోషన్స్‌లో భాగంగా తమిళనాడులో జరిగిన కార్యక్రమాల్లో హీరో నాని తన తమిళ సినీ ప్రయాణాన్ని గుర్తుచేసుకున్నారు. తన కెరీర్ ప్రారంభ దశలో నటించిన వెప్పం, ఆహా కళ్యాణం చిత్రాలను ప్రస్తావించిన ఆయన, దర్శకుడు మణిరత్నంతో కలిసి పనిచేయాలనే తన కోరికను వెల్లడించారు. నటుడిగా తనపై మణిరత్నం ప్రభావం ఎంతో ఉందని నాని పలుమార్లు చెప్పిన విషయం తెలిసిందే. ఆయన దర్శకత్వంలో నటించడం తన జీవితకాల కల అని నాని పేర్కొన్నారు.

శ్రీకాంత్ ఓదెల దర్శకత్వంలో భారీ స్థాయిలో తెరకెక్కుతున్న ది ప్యారడైజ్ చిత్రంలో నాని జాదల్ అనే పాత్రలో కనిపించనున్నారు. ఇప్పటివరకు ఆయన పోషించిన పాత్రలకు పూర్తి భిన్నంగా ఈ క్యారెక్టర్ ఉండబోతున్నట్లు చిత్రబృందం చెబుతోంది. కాయదు లోహర్, సోనాలి కులకర్ణి, మోహన్ బాబు కీలక పాత్రల్లో నటిస్తున్నారు. అనిరుధ్ రవిచందర్ సంగీతం అందిస్తున్న ఈ చిత్రం సెప్టెంబర్ 24న తెలుగు, తమిళం, హిందీ, కన్నడ, మలయాళ భాషల్లో విడుదల కానుంది.