నయనతార ‘హాయ్’పై ఆసక్తికర వ్యాఖ్యలు!

లేడీ సూపర్‌స్టార్ నయనతార, యువ హీరో కవిన్ జంటగా నటించిన రొమాంటిక్ కామెడీ చిత్రం ‘హాయ్’ ఆగస్టు 28న ప్రపంచవ్యాప్తంగా థియేటర్లలో విడుదల కానుంది. విష్ణు ఎడవన్ దర్శకత్వం వహించిన ఈ సినిమా షూటింగ్ పూర్తయింది. ప్రమోషన్స్‌లో పాల్గొన్న నయనతార మాట్లాడుతూ.. ‘హాయ్’ చాలా క్యూట్ అండ్ స్వీట్ లవ్ స్టోరీ అని తెలిపారు. తన కెరీర్‌లో విజయవంతమైన ‘యారడి నీ మోహిని’ తరహా ఫ్యామిలీ, రొమాంటిక్ ఎంటర్‌టైనర్‌ను ప్రేక్షకులు చూసి చాలా కాలమైందని, ‘హాయ్’ కూడా అలాంటి అనుభూతిని అందిస్తుందని చెప్పారు. అయితే ఈ సినిమా పాత చిత్రంతో పోలిస్తే మరింత మోడ్రన్‌గా, ప్రస్తుత కాలానికి అనుగుణంగా ఉంటుందని పేర్కొన్నారు.

‘యారడి నీ మోహిని’లో పెద్ద ఉమ్మడి కుటుంబం కనిపిస్తే.. ‘హాయ్’లో సింపుల్, క్యూట్, బడ్జెట్ ఫ్రెండ్లీ చిన్న కుటుంబం ఉంటుందని నయనతార తెలిపారు. కుటుంబ బంధాలు, ప్రేమ, వినోదం కలగలిపిన కథగా ఈ సినిమా తెరకెక్కిందన్నారు. ప్రేమ, పెళ్లి చూపుల్లో వరుసగా తిరస్కరణకు గురయ్యే ఓ సాధారణ యువకుడికి, సమాజపు పాత ఆలోచనలను పట్టించుకోని స్వతంత్ర భావాలున్న యువతికి అనుకోకుండా పెళ్లి జరుగుతుందని చెప్పారు. ఆ తర్వాత ఏకపక్ష ప్రేమ క్రమంగా నిజమైన ప్రేమగా ఎలా మారుతుందనేది సినిమాలో ఆసక్తికరంగా చూపించారని దర్శకుడు విష్ణు ఎడవన్‌ను నయనతార ప్రశంసించారు.