రామ్ చరణ్ ‘పెద్ది’ విజయ వేడుకకు రంగం సిద్ధం

మెగా పవర్ స్టార్ రామ్ చరణ్ హీరోగా నటించిన ‘పెద్ది’ చిత్రం బాక్సాఫీస్ వద్ద విజయవంతంగా ప్రదర్శితమవుతూ మంచి వసూళ్లను నమోదు చేస్తోంది. ప్రేక్షకుల నుంచి లభిస్తున్న విశేష ఆదరణతో చిత్రబృందం మెగా బ్లాక్‌బస్టర్ ఈవెంట్ నిర్వహించేందుకు సిద్ధమైంది. ఈ విజయోత్సవానికి సంబంధించిన తేదీ, వేదికను చిత్ర యూనిట్ అధికారికంగా ప్రకటించింది.

జూన్ 23న సాయంత్రం 6 గంటలకు హైదరాబాద్‌లోని శిల్పకళా వేదికలో ఈ కార్యక్రమం నిర్వహించనున్నట్లు వెల్లడించారు. ఈ వేడుకలో చిత్రబృందంతో పాటు ప్రత్యేక అతిథులు కూడా పాల్గొనే అవకాశముందనే చర్చ సినీ వర్గాల్లో సాగుతోంది. బుచ్చిబాబు సనా దర్శకత్వంలో తెరకెక్కిన ఈ చిత్రంలో జాన్వీ కపూర్ కథానాయికగా నటించగా, ఏఆర్ రెహమాన్ సంగీతం అందించారు. జగపతిబాబు, శివరాజ్ కుమార్, దివ్యేందు, బొమన్ ఇరానీ కీలక పాత్రలు పోషించారు.