‘కమలా రెడ్డి’గా రమ్యకృష్ణ..

హీరో మంచు మనోజ్‌ ‘డేవిడ్‌ రెడ్డి’గా ప్రేక్షకులను పలకరించనున్నారు. హనుమ రెడ్డి యక్కంటి దర్శకత్వంలో తెరకెక్కుతున్న ఈ చిత్రాన్ని వెంకట్‌ రెడ్డి, భరత్‌ మోటుకూరి నిర్మిస్తున్నారు. మారియా ర్యాబోషాప్కా కథానాయికగా నటిస్తుండగా, రమ్యకృష్ణ కీలక పాత్రలో కనిపించనున్నారు. మంగళవారం రమ్యకృష్ణ పుట్టినరోజు సందర్భంగా ఆమె పాత్రకు సంబంధించిన ఫస్ట్‌లుక్‌ను చిత్రబృందం విడుదల చేసింది. ఇందులో ‘కమలా రెడ్డి’గా రమ్యకృష్ణ చేతిలో ఖడ్గంతో వీరనారిలా కనిపించారు. ఆమె చుట్టూ శత్రువులు రక్తపు మడుగులో పడి ఉండటం ఫస్ట్‌లుక్‌పై ఆసక్తిని పెంచింది.

బ్రిటిష్‌ కాలం నాటి నేపథ్యంతో రూపొందుతున్న ఈ చిత్రం భారీ యాక్షన్‌ డ్రామాగా తెరకెక్కుతోంది. ఇందులో మంచు మనోజ్‌ శక్తిమంతమైన యోధుడి పాత్రలో కనిపించనున్నట్లు చిత్రబృందం తెలిపింది. ప్రస్తుతం నిర్మాణ కార్యక్రమాలు ముగింపు దశకు చేరుకున్న ఈ చిత్రం త్వరలో థియేటర్లలో విడుదల కానుంది. ఈ సినిమాకు రవి బస్రూర్‌ సంగీతం అందిస్తుండగా, ఆచార్య వేణు ఛాయాగ్రహణం నిర్వహిస్తున్నారు.