వివాదంపై స్పందించిన సంపూర్ణేశ్ బాబు

ది ప్యారడైజ్ సినిమా ప్రమోషన్స్‌లో భాగంగా హీరో సంపూర్ణేశ్ బాబు, జర్నలిస్ట్ నాగేంద్ర కుమార్ మధ్య జరిగిన ఇంటర్వ్యూ సోషల్ మీడియాలో చర్చకు దారితీసింది. ఇంటర్వ్యూలో సినీ నేపథ్యం లేకపోయినా పరిశ్రమలోకి ఎందుకు వచ్చారంటూ నాగేంద్ర కుమార్ ప్రశ్నించారు. ఈ క్రమంలో ఆయన చేసిన ఓ వ్యాఖ్యపై నెటిజన్లు, సంపూర్ణేశ్ బాబు అభిమానులు అభ్యంతరం వ్యక్తం చేశారు. నటుడిని అలా ప్రశ్నించడం సరికాదంటూ సోషల్ మీడియాలో విమర్శలు వెల్లువెత్తాయి.

వివాదం నేపథ్యంలో జర్నలిస్ట్ నాగేంద్ర కుమార్ తన వ్యాఖ్యలపై క్షమాపణలు చెప్పారు. తాను ఉద్దేశపూర్వకంగా ఆ వ్యాఖ్యలు చేయలేదని, సంభాషణలో భాగంగా అనుకోకుండా అలా మాట్లాడినట్లు వివరణ ఇచ్చారు. అనంతరం సంపూర్ణేశ్ బాబు కూడా ఈ వ్యవహారంపై స్వయంగా వీడియో ద్వారా స్పందించారు. నాగేంద్ర కుమార్ తనకు ఎంతో సన్నిహితుడని, హృదయ కాలేయం సినిమా రోజుల నుంచి జర్నలిస్టులు తనను సోదరుడిలా ఆదరిస్తున్నారని తెలిపారు. తమ మధ్య ఉన్న సాన్నిహిత్యం కారణంగానే ఆ వ్యాఖ్యలు వచ్చాయని, వాటిని ఎవరూ మరో విధంగా అర్థం చేసుకోవద్దని అభిమానులను కోరారు. సంపూర్ణేశ్ బాబు విడుదల చేసిన ఈ వీడియో ప్రస్తుతం సోషల్ మీడియాలో విస్తృతంగా షేర్ అవుతోంది.