సైమా అవార్డ్స్‌-2026.. ఉత్తమ నటులుగా తేజ సజ్జా, రిషబ్‌ శెట్టి!

సౌత్‌ ఇండియన్‌ ఇంటర్నేషనల్‌ మూవీ అవార్డ్స్‌-2026 వేడుకలు బెంగళూరులోని కోరమంగళ ఇండోర్‌ స్టేడియంలో అట్టహాసంగా ప్రారంభమయ్యాయి. రెండు రోజుల పాటు జరిగే ఈ అవార్డుల వేడుకకు దక్షిణాది సినీ పరిశ్రమలకు చెందిన పలువురు ప్రముఖ నటీనటులు, సాంకేతిక నిపుణులు హాజరై సందడి చేశారు. తొలిరోజు తెలుగు, కన్నడ చిత్రాల్లో ప్రతిభ కనబరిచిన వారికి వివిధ విభాగాల్లో అవార్డులు అందించారు.

‘మిరాయ్‌’ చిత్రంలో నటనకు యువ కథానాయకుడు తేజ సజ్జా ఉత్తమ నటుడి అవార్డును అందుకున్నారు. ‘సంక్రాంతికి వస్తున్నాం’లో నటనకు ఐశ్వర్య రాజేశ్‌ ఉత్తమ నటి (క్రిటిక్స్‌) అవార్డును సొంతం చేసుకున్నారు. ఇదే చిత్రానికి బుల్లిరాజు అలియాస్‌ భీమల రేవంత్‌ ఉత్తమ హాస్యనటుడి అవార్డును అందుకున్నారు. ‘కాంతార: చాప్టర్‌ 1’లో నటనకు కన్నడ నటుడు రిషబ్‌ శెట్టి ఉత్తమ నటుడిగా అవార్డు దక్కించుకున్నారు.