సుడిగాలి సుధీర్ గోట్‌కు రిలీజ్ డేట్ ఫిక్స్

జబర్దస్త్ ఫేమ్ సుడిగాలి సుధీర్ హీరోగా నటిస్తున్న తాజా చిత్రం ‘గోట్’(గ్రేటెస్ట్ ఆఫ్ ఆల్ టైమ్స్). వేదవ్యాస్ దర్శకత్వం వహిస్తున్న ఈ చిత్రంలో దివ్యభారతి హీరోయిన్‌గా నటిస్తోంది. మహాతేజ క్రియేషన్స్, జైష్ణవ్ ప్రొడక్షన్స్ సంయుక్తంగా నిర్మిస్తున్న ఈ సినిమాను ఏషియన్ సినిమాస్ సమర్పిస్తోంది. ఈ చిత్రాన్ని నవంబర్ 12న గ్రాండ్ థియేట్రికల్ రిలీజ్ చేయనున్నట్లు మేకర్స్ ప్రకటించారు. వినోదం, భావోద్వేగాలు, ఉత్కంఠతో కూడిన వెండితెర అనుభవానికి సిద్ధంగా ఉండాలంటూ కొత్త పోస్టర్‌ను విడుదల చేశారు.

ఇప్పటికే సినిమా నుంచి విడుదలైన కంటెంట్‌కు మంచి స్పందన లభించిందని చిత్రబృందం తెలిపింది. త్వరలోనే ట్రైలర్‌ను విడుదల చేసేందుకు సన్నాహాలు చేస్తున్నారు. ఖర్చు విషయంలో ఎక్కడా రాజీపడకుండా సినిమాను భారీ స్థాయిలో తెరకెక్కిస్తున్నామని నిర్మాత తెలిపారు. సాంకేతికంగా ఉన్నత ప్రమాణాలతో రూపొందుతున్న ఈ చిత్రం సుడిగాలి సుధీర్ కెరీర్‌లో మైలురాయిగా నిలుస్తుందని ఆయన అన్నారు. పూర్తి కమర్షియల్ అంశాలతో పాటు నేటి యువతను ఆలోచింపజేసే మంచి సందేశం కూడా సినిమాలో ఉంటుందని పేర్కొన్నారు.