‘ది ప్యారడైజ్’ వివాదాస్పద సన్నివేశంపై శ్రీకాంత్ ఓదెల క్లారిటీ

నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్‌లో తెరకెక్కిన ‘ది ప్యారడైజ్’ బాక్సాఫీస్ వద్ద సందడి చేస్తోంది. అయితే సినిమాలో తల్లి, కూతురి మధ్య వచ్చే ఓ కీలక సన్నివేశంపై సోషల్ మీడియాలో విమర్శలు, ట్రోలింగ్ వ్యక్తమవుతున్నాయి. ముఖ్యంగా కూతురితో తల్లి వీడియోలు తీయించే సన్నివేశం, “నువ్వు సింగిల్ టేక్ ఆర్టిస్ట్‌వి బిడ్డా” అనే డైలాగ్‌పై కొందరు ప్రేక్షకులు అభ్యంతరం వ్యక్తం చేశారు. ఈ నేపథ్యంలో దర్శకుడు శ్రీకాంత్ ఓదెల స్పందిస్తూ, ఆ సన్నివేశం వెనుక ఉన్న ఉద్దేశాన్ని, దానికి సంబంధించిన భావోద్వేగ నేపథ్యాన్ని వివరించారు.

దర్శకుడి వివరణ ప్రకారం, హీరోయిన్ కావాలనే కోరికతో చిన్నతనంలో ఆ అమ్మాయి ఇంటి నుంచి వెళ్లిపోతుంది. అప్పుడు ఆమె తల్లి ఆమెకు నటన రాదని, సినిమాల్లో ఎవరూ అవకాశం ఇవ్వబోరని చెబుతుంది. అనంతరం పరిస్థితుల కారణంగా తల్లి సమక్షంలో కూతురు నటించాల్సి వచ్చినప్పుడు, ఆమెలోని అద్భుతమైన ప్రతిభను తల్లి గుర్తించి, గతంలో తాను చెప్పిన మాటలకు భిన్నంగా ఆమె నిజమైన ప్రతిభావంతురాలని అంగీకరించేలా ఆ సన్నివేశాన్ని రూపొందించారు. ఈ భావోద్వేగ ముగింపు బాగున్నప్పటికీ, దానికి సంబంధించిన నేపథ్యం తెరపై సరిగ్గా కనెక్ట్ కాలేదని శ్రీకాంత్ ఓదెల అంగీకరించారు. సినిమా నిడివి కారణంగా ఎడిటింగ్ సమయంలో చిన్నతనానికి సంబంధించిన కీలక సన్నివేశాన్ని తొలగించాల్సి వచ్చిందని తెలిపారు. దీంతో అసలు నేపథ్యం తెలియని ప్రేక్షకులకు తల్లి కూతురిని స్వార్థం కోసం ఉపయోగించుకుంటున్నట్లుగా సన్నివేశం అర్థమయ్యే అవకాశం ఏర్పడిందని, దర్శకుడు శ్రీకాంత్ ఓదెల, నాని వివరించారు.