అధికార బలంతో ఎన్నికలు గెలవొచ్చు.. ప్రజల విశ్వాసాన్ని కాదు: వైఎస్ జగన్

జెడ్పీటీసీ, ఎంపీటీసీ ఎన్నికల ఫలితాలపై వైఎస్సార్‌సీపీ అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి విమర్శలు చేశారు. స్థానిక సంస్థల ఎన్నికల్లో అధికార పార్టీ అక్రమాలకు పాల్పడిందని ఆయన ఆరోపించారు. నామినేషన్ల ప్రక్రియ నుంచి పోలింగ్ వరకు ప్రజాస్వామ్యాన్ని ఖూనీ చేశారని, తాజాగా కౌంటింగ్‌లోనూ అదే విధంగా వ్యవహరించారని సామాజిక మాధ్యమం ఎక్స్‌లో చేసిన పోస్టులో పేర్కొన్నారు. మున్సిపల్ ఎన్నికల కౌంటింగ్ తరహాలోనే అధికారులపై ఒత్తిడి తెచ్చి పలు జిల్లాల్లో ఫలితాలను తారుమారు చేశారని ఆరోపించారు.

అధికార బలంతో చంద్రబాబు ఎన్నికల్లో గెలిచి ఉండొచ్చని, కానీ నైతికంగా ఓడిపోయారని జగన్ వ్యాఖ్యానించారు. తమ పార్టీ ఎన్నికల్లో ఓడిపోయినా ప్రజల మనసులను గెలుచుకుందని పేర్కొన్నారు. ప్రజాస్వామ్య పరిరక్షణ కోసం అడ్డంకులు, దాడులు, నిర్బంధాలను ఎదుర్కొంటూ పోరాడిన పార్టీ నాయకులు, కార్యకర్తలు, ముఖ్యంగా మహిళలకు అభినందనలు తెలిపారు. రైతులు, మహిళలు, యువత, కార్మికులు, ఉద్యోగులు సహా ప్రతి పౌరుడి హక్కుల కోసం పోరాటం కొనసాగిస్తామని, మెరుగైన ఆంధ్రప్రదేశ్ నిర్మాణం కోసం కృషి చేస్తామని స్పష్టం చేశారు.