గోకుల్ డెయిరీ వివాదం.. రాహుల్ గాంధీకి ఫడ్నవీస్ స్ట్రాంగ్ కౌంటర్

మహారాష్ట్రలోని కొల్హాపూర్ జిల్లా గోకుల్ డెయిరీ పాలకవర్గ వివాదం రాజకీయంగా చర్చనీయాంశంగా మారింది. ఈ వ్యవహారంపై కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీ చేసిన విమర్శలకు మహారాష్ట్ర ముఖ్యమంత్రి దేవేంద్ర ఫడ్నవీస్ స్పందించారు. కేవలం 4,500 మంది ఓటర్లు ఉన్న స్థానిక సహకార సంస్థ అంశంపై ఢిల్లీలో కూర్చొని ట్వీట్ చేయడం ఏమిటని ఆయన ప్రశ్నించారు. గోకుల్ డెయిరీ ఎన్నికల్లో ఒక పక్షానికి 13, మరో పక్షానికి 12 స్థానాలు వచ్చాయని, పాలకవర్గ సమావేశాలకు అవసరమైన కోరం లేకపోవడంతో అధ్యక్షుడి ఎన్నిక రెండుసార్లు వాయిదా పడిందని ఫడ్నవీస్ వివరించారు.

ప్రభుత్వ నిర్ణయాన్ని సమర్థించుకున్న ఫడ్నవీస్.. అడ్వకేట్ జనరల్ సలహా తీసుకున్న తర్వాతే సంబంధిత ఆర్డినెన్స్ తీసుకొచ్చినట్లు తెలిపారు. మరోవైపు, ఎన్నికల ఫలితాలు వెలువడిన తర్వాత నిబంధనలు మార్చి ప్రభుత్వ నామినేటెడ్ డైరెక్టర్లను చేర్చడం ద్వారా మెజారిటీని మార్చేందుకు ప్రయత్నిస్తున్నారని రాహుల్ గాంధీ ఆరోపించారు. ఇది పాల ఉత్పత్తిదారుల ప్రజాస్వామ్య తీర్పును వక్రీకరించడమేనని విమర్శించారు. ఈ అంశం మహారాష్ట్రలో అధికార, ప్రతిపక్షాల మధ్య రాజకీయ వివాదానికి దారితీసింది.