యాపిల్ ఉద్యోగులకు షాక్.. ఏఐ వినియోగ బడ్జెట్‌లో భారీ కోత!

ఖర్చుల నియంత్రణ చర్యల్లో భాగంగా అమెరికాకు చెందిన ప్రముఖ సాంకేతిక సంస్థ యాపిల్ కీలక నిర్ణయం తీసుకుంది. తమ ఉద్యోగులు కృత్రిమ మేధ (ఏఐ) సాధనాల వినియోగానికి కేటాయించిన బడ్జెట్‌ను కంపెనీ తగ్గించింది. ఇప్పటివరకు ఇంజినీర్లకు రోజువారీ ఏఐ వినియోగం కోసం 300 డాలర్లు కేటాయించగా, తాజాగా ఆ మొత్తాన్ని 200 డాలర్లకు పరిమితం చేసింది. అంతేకాకుండా, కొన్ని విభాగాల్లో ఈ వ్యయ పరిమితిని కేవలం 25 డాలర్లకు తగ్గించే యోచనలో ఉన్నట్లు సమాచారం.

ఏఐ సాధనాల వినియోగంపై ఖర్చులను మరింత కట్టడి చేయడమే ఈ నిర్ణయం వెనుక ప్రధాన ఉద్దేశంగా తెలుస్తోంది. మైక్రోసాఫ్ట్, అమెజాన్ వంటి ప్రముఖ సాంకేతిక సంస్థలు ఇప్పటికే ఏఐ వినియోగ వ్యయాలపై నియంత్రణలు విధిస్తుండగా, ఇప్పుడు యాపిల్ కూడా అదే బాటలో పయనిస్తోంది. ఇకపై ఏఐ సాధనాల వినియోగానికి కేటాయించిన బడ్జెట్‌ కంటే అదనపు నిధులు అవసరమైతే, ఉద్యోగులు తప్పనిసరిగా ఉన్నతాధికారుల అనుమతి తీసుకోవాల్సి ఉంటుంది.