ఇరాన్ కీలక నేతలే టార్గెట్.. ఇజ్రాయెల్ రహస్య ఆపరేషన్‌కు ప్లాన్?

2024లో లెబనాన్‌లో హెజ్‌బొల్లా సభ్యుల పేజర్లను పేల్చిన ఘటన తరహాలోనే ఇరాన్‌పై కూడా రహస్య ఆపరేషన్లు చేపట్టేందుకు ఇజ్రాయెల్ ప్రణాళికలు రచిస్తున్నట్లు అంతర్జాతీయ మీడియా కథనాలు వెల్లడించాయి. మొసాద్ మాజీ గ్లోబల్ ఆపరేషన్స్ డిప్యూటీ హెడ్ ఒడెడ్ ఐలామ్‌ను ఉటంకిస్తూ ఈ కథనాలు వెలువడ్డాయి. అమెరికా, ఇజ్రాయెల్ మరోసారి ఇరాన్‌పై దాడులు ప్రారంభిస్తే.. అక్కడి కీలక నేతలు ఉపయోగించే పేజర్లు, బీపర్లు, వాకీటాకీల వంటి కమ్యూనికేషన్ పరికరాలను లక్ష్యంగా చేసుకునే అవకాశముందని సమాచారం. ఇలాంటి పేలుడు పదార్థాలు అమర్చిన పరికరాలను ఇప్పటికే ఇరాన్‌కు చేరవేసి ఉండవచ్చని కూడా కథనాలు పేర్కొంటున్నాయి. సంప్రదాయ భూతల దాడుల కంటే ఇటువంటి రహస్య ఆపరేషన్లు మరింత తీవ్ర పరిణామాలకు దారితీయవచ్చని విశ్లేషణలు వెలువడుతున్నాయి. గతంలో ఇరాన్ అణు కార్యక్రమానికి అవసరమైన సెంట్రిఫ్యూజ్‌లలో పేలుడు పదార్థాలు అమర్చారని, 2020లో నతాంజ్ అణు కేంద్రంలో జరిగిన పేలుడుకు అవే కారణమని మాజీ విదేశాంగ మంత్రి మహమ్మద్ జావెద్ జారిఫ్ ఆరోపించినట్లు కథనాలు గుర్తుచేస్తున్నాయి.

ఇజ్రాయెల్ టార్గెట్‌లో నలుగురు కీలక వ్యక్తులు?

ఇరాన్‌లో అధ్యక్షుడు పెజెష్కియన్, సుప్రీం నేత మొజ్తబా ఖమేనీ, విదేశాంగ మంత్రి అబ్బాస్ అరాగ్చి, పార్లమెంట్ స్పీకర్ మొహమ్మద్ గాలిబఫ్‌ల వెనుక అసలు నిర్ణయాధికారులు మరికొందరే ఉన్నారని ఇజ్రాయెల్ భావిస్తున్నట్లు కథనాలు పేర్కొంటున్నాయి. ఆ జాబితాలో ఐఆర్‌జీసీ కమాండర్-ఇన్-చీఫ్ అహ్మద్ వాహిది, బసిజ్ దళాల కమాండర్ హుస్సేన్ తాయెబ్, ఇరాన్ సైన్యాధిపతి అలీ అబ్దుల్లాహి, సుప్రీం నేషనల్ సెక్యూరిటీ కౌన్సిల్ కార్యదర్శి మొహ్సెన్ రెజాయి ఉన్నట్లు సమాచారం. జనవరిలో జరిగిన నిరసనల అణచివేతలో, అలాగే అమెరికాతో ఒప్పందం కుదుర్చుకునే ప్రయత్నాలను అడ్డుకోవడంలో వీరి పాత్ర ఉందని కథనాలు ఆరోపిస్తున్నాయి. హర్మూజ్ జలసంధిని తిరిగి తెరవాలన్న ప్రకటన తర్వాత కూడా దాన్ని మూసివేయడంలో ఐఆర్‌జీసీ పాత్ర ఉందని పేర్కొంటున్నాయి. ఈ నలుగురిని లక్ష్యంగా చేసుకుని రహస్య ఆపరేషన్లు చేపట్టాలని ఇజ్రాయెల్ యోచిస్తున్నట్లు ప్రచారం జరుగుతున్నప్పటికీ, ఈ ప్రణాళికలపై స్వతంత్ర ధ్రువీకరణ లేదు.