గవర్నర్‌ను కలిసిన ఎంపీ రఘునందన్ రావు

లోక్‌భవన్‌లో గవర్నర్‌ను కలిసిన అనంతరం ఎంపీ రఘునందన్ రావు మీడియాతో మాట్లాడుతూ, అక్టోబర్ 4న తూప్రాన్‌లోని బ్రాహ్మణపల్లిలో అమూల్ చిల్లింగ్ సెంటర్‌కు కేంద్ర హోంమంత్రి అమిత్ షా చేతుల మీదుగా శంకుస్థాపన కార్యక్రమం జరగనుందని తెలిపారు. దక్షిణ భారతదేశంలోనే ఇది అతిపెద్ద సంస్థగా నిలవనుందని, చిత్తూరు ప్లాంట్ కంటే కూడా పెద్దదిగా ఉంటుందని చెప్పారు. మెదక్ ప్రాంతంలోని పాల ఉత్పత్తి రైతులు ఈ అవకాశాన్ని సద్వినియోగం చేసుకోవాలని ఆయన విజ్ఞప్తి చేశారు. ప్రధాని నరేంద్ర మోదీ జన్మదినం సందర్భంగా సేవా సంకల్పంలో భాగంగా అక్టోబర్ 6న గవర్నర్ శివప్రసాద్ శుక్లా చేతుల మీదుగా రామాయంపేట నుంచి సిద్దిపేట వరకు జాతీయ రహదారి 765 డీజీపై 30 వేల బాదం చెట్లను నాటే కార్యక్రమాన్ని నిర్వహించనున్నట్లు తెలిపారు. 44 కిలోమీటర్ల మేర రహదారికి ఇరువైపులా ఒకే రోజు చెట్లు నాటడం గొప్ప కార్యక్రమమని పేర్కొన్నారు.

కాంగ్రెస్ పార్టీపై రఘునందన్ రావు విమర్శలు చేశారు. దేవుళ్లను కూడా విభజించే విధంగా కాంగ్రెస్ వ్యవహరిస్తోందని, 119 నియోజకవర్గాలను సమానంగా చూడాలని అన్నారు. సీఎం రేవంత్ రెడ్డి కొడంగల్ నియోజకవర్గానికే పరిమితం కాకుండా రాష్ట్రంలోని అన్ని ప్రాంతాలను సమానంగా అభివృద్ధి చేయాలని కోరారు. భద్రాచలం శ్రీరాముడికి సీఎం హోదాలో తలంబ్రాలు సమర్పించడం లేదా, కొమురవెల్లి మల్లన్న ఆలయాన్ని ఎందుకు అభివృద్ధి చేయడం లేదని ప్రశ్నించారు. సిరిసిల్లపై దండయాత్ర చేసినట్లుగా వ్యవహరించడం కాకుండా, దమ్ముంటే బీఆర్ఎస్ వర్కింగ్ ప్రెసిడెంట్ కేటీఆర్‌ను అరెస్ట్ చేసి చూపించాలని రేవంత్ రెడ్డికి సవాల్ చేశారు.