రాహుల్ గాంధీ నివాసంలో విపక్ష ఎంపీల సమావేశం

కాంగ్రెస్ అగ్రనేత రాహుల్ గాంధీ నివాసంలో విపక్ష ఎంపీలు సమావేశమయ్యారు. దేశవ్యాప్తంగా కొనసాగుతున్న ఓటర్ల జాబితా ప్రత్యేక సమగ్ర సవరణ (ఎస్‌ఐఆర్) ప్రక్రియపై తమ ఆందోళనను మరింత ఉధృతం చేయాలని ఈ భేటీలో నిర్ణయించినట్లు సమాచారం. ఢిల్లీ నుంచి క్షేత్రస్థాయి వరకు నిరసన కార్యక్రమాలను విస్తరించడంపై చర్చించారు. సోమవారం నిర్వహించిన నిరసనకు లభించిన స్పందనను సమీక్షించడంతో పాటు, సుప్రీంకోర్టుకు వినతిపత్రం సమర్పించిన తర్వాత చోటుచేసుకున్న పరిణామాలపైనా నేతలు చర్చించారు.

దసరా, దీపావళి పండగల నేపథ్యంలో నిరసన కార్యక్రమాలకు తాత్కాలిక విరామం ఇవ్వాలని విపక్ష నేతలు భావిస్తున్నట్లు సమాచారం. పండగల అనంతరం మరోసారి ఆందోళనలు చేపట్టే అవకాశాలపై సమావేశంలో చర్చించారు. మరోవైపు, ఈ సమావేశానికి ఆమ్ ఆద్మీ పార్టీ (ఆప్) దూరంగా ఉండటంపై కూటమి నేతల్లో అసంతృప్తి వ్యక్తమైనట్లు తెలుస్తోంది. ఎస్‌ఐఆర్‌పై భవిష్యత్తులో చేపట్టాల్సిన కార్యాచరణ, విపక్షాల మధ్య సమన్వయం వంటి అంశాలు ఈ భేటీలో ప్రధానంగా చర్చకు వచ్చినట్లు సమాచారం.