ఢిల్లీలో నిరసనల అణచివేతను ఆపాలి.. ఓటర్ల జాబితా అక్రమాలపై విచారణ జరపాలి: పొన్నం ప్రభాకర్

ఢిల్లీలో ఎన్నికల ప్రక్రియలో అవకతవకలు జరుగుతున్నాయంటూ నిరసన తెలిపేందుకు ప్రయత్నించిన ప్రతిపక్ష నాయకులు, విద్యార్థులను అడ్డుకోవడం, అరెస్టులు చేయడంపై తెలంగాణ రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ తీవ్ర అభ్యంతరం వ్యక్తం చేశారు. ప్రజాస్వామ్యంలో ప్రశ్నించే హక్కు, శాంతియుతంగా నిరసన తెలిపే హక్కు ప్రతి పౌరుడికి ఉంటాయని ఆయన పేర్కొన్నారు. ప్రత్యేక ఓటర్ల జాబితా సవరణ (SIR) పేరుతో అర్హులైన ఓటర్ల పేర్లను తొలగిస్తున్నారనే ఆరోపణలపై ఎన్నికల సంఘం సమాధానం చెప్పాలని, దొంగ ఓట్ల నమోదుకు సంబంధించిన ఫిర్యాదులపైనా పారదర్శకంగా విచారణ జరపాలని డిమాండ్ చేశారు. ఎన్నికల ప్రధాన కమిషనర్ జ్ఞానేష్ కుమార్ ఈ అంశాలపై స్పష్టత ఇవ్వాలని కోరారు.

జంతర్ మంతర్ వద్ద నిరసనలకు వెళ్లకుండా అడ్డుకోవడం, విద్యార్థులను నిర్బంధించడం, ఇంటర్నెట్, రైళ్లు, బస్సులు, మెట్రో సేవలపై ఆంక్షలు విధిస్తున్నారనే వార్తలపై సంబంధిత అధికారులు వివరణ ఇవ్వాలని మంత్రి కోరారు. రాహుల్ గాంధీ, ప్రియాంక గాంధీ వంటి ప్రతిపక్ష నాయకులపై పోలీసుల చర్యలకు సంబంధించి వస్తున్న ఆరోపణలు ఆందోళన కలిగిస్తున్నాయని అన్నారు. నిరసనకారులను అడ్డుకునేందుకు బీజేపీ, సంఘ్ పరివార్ కార్యకర్తలను సమీకరిస్తున్నారనే ఆరోపణలపైనా స్పష్టత ఇవ్వాలని డిమాండ్ చేశారు. ఈడీ, సీబీఐ, ఎన్నికల సంఘం వంటి రాజ్యాంగబద్ధ సంస్థలు స్వతంత్రంగా, నిష్పక్షపాతంగా పనిచేయాలని పేర్కొన్నారు. ఓటర్ల జాబితాలో అవకతవకలపై సమగ్ర విచారణ జరిపి, అర్హులైన ప్రతి ఓటరు హక్కును కాపాడాలని కోరారు. ప్రజాస్వామ్య విలువలను గౌరవిస్తూ శాంతిభద్రతలను పరిరక్షించాలని, నిరసన తెలిపే హక్కును ఎవరూ కాలరాయకూడదని పొన్నం ప్రభాకర్ స్పష్టం చేశారు.