అహోబిలంలో హైటెన్షన్.. గంగుల కుటుంబానికి అఖిలప్రియ సవాల్

నంద్యాల జిల్లా అహోబిలంలో తలనీలాల వివాదం నేపథ్యంలో భూమా మరియు గంగుల కుటుంబాల మధ్య రాజకీయ ఉద్రిక్తతలు మరింత పెరిగాయి. మాజీ మంత్రి భూమా అఖిలప్రియ తనపై చేసిన ఆరోపణలను నిరూపించాలని గంగుల కుటుంబానికి సవాల్ విసిరారు. వాస్తవాలు ప్రజల ముందుకు రావాలంటే అహోబిలంలో బహిరంగ చర్చకు రావాలని ఆమె పిలుపునిచ్చారు.

ఇప్పటికే అహోబిలానికి చేరుకున్న అఖిలప్రియ, తనపై చేసిన ఆరోపణలు నిజమని రుజువైతే ఎమ్మెల్యే పదవికి రాజీనామా చేయడానికి సిద్ధమని ప్రకటించారు. ఒకవేళ చర్చకు రాకపోతే గంగుల కుటుంబం ఇంటికి వెళ్లి సమాధానం కోరుతానని హెచ్చరించారు. ఈ పరిణామాలతో అహోబిలంలో రాజకీయ వాతావరణం ఉద్రిక్తంగా మారగా, ఇరు వర్గాల కార్యకర్తలు తదుపరి పరిణామాలపై ఆసక్తిగా ఎదురుచూస్తున్నారు.