యోగి అహంకారాన్ని త్వరలోనే తుడిచిపెట్టేస్తాం – అఖిలేష్ యాదవ్

అయోధ్య నుంచి వచ్చే ఎన్నికల్లో పోటీ చేయాలన్న సవాల్‌పై ఉత్తరప్రదేశ్ ముఖ్యమంత్రి యోగి ఆదిత్యనాథ్ విసిరిన ప్రతిసవాల్‌కు సమాజ్‌వాది పార్టీ (ఎస్పీ) అధ్యక్షుడు అఖిలేష్ యాదవ్ ఘాటుగా స్పందించారు. రెండు రోజుల క్రితం అయోధ్య నుంచి పోటీ చేయాలని అఖిలేష్.. యోగికి సవాల్ విసిరారు. దీనిని స్వీకరించిన యోగి, అఖిలేష్ కూడా తనతోపాటు అదే నియోజకవర్గం నుంచి పోటీ చేయాలని ప్రతిసవాల్ చేశారు. దీనిపై స్పందించిన అఖిలేష్.. యోగి అహంకారాన్ని త్వరలోనే తుడిచిపెట్టేస్తామని వ్యాఖ్యానించారు.

అయోధ్య రామాలయానికి వచ్చిన విరాళాలను దుర్వినియోగం చేశారని ఆరోపించిన వారి అహంకారాన్ని అణచివేసేలా పెను తుపాను రాబోతోందని అఖిలేష్ యాదవ్ ‘ఎక్స్‌’లో పోస్ట్ చేశారు. విరాళాల దుర్వినియోగానికి పాల్పడినవారిని ఓడించడానికి తాను స్వయంగా పోటీ చేయాల్సిన అవసరం లేదని, తన పార్టీ కార్యకర్తలే సరిపోతారని పేర్కొన్నారు. యోగి తరఫున ఉత్తరప్రదేశ్ నుంచి పోటీ చేసేందుకు ఎవరూ సిద్ధంగా లేరని కూడా అఖిలేష్ ఆరోపించారు.