మోదీని శకునితో పోల్చిన తేజస్వీ..జ్ఞానేశ్‌పై దేశద్రోహం కేసు పెట్టాలని డిమాండ్‌

ప్రధాని నరేంద్ర మోదీ, ప్రధాన ఎన్నికల కమిషనర్‌ జ్ఞానేశ్‌ కుమార్‌పై తేజస్వీ తీవ్ర విమర్శలు చేశారు. ఓట్ల చోరీకి పాల్పడుతున్నారనే ఆరోపణలకు వ్యతిరేకంగా తాము మహాభారతాన్ని ప్రదర్శిస్తున్నామని వ్యాఖ్యానించారు. సాధారణంగా రాంలీలా మైదాన్‌లో రామాయణాన్ని ప్రదర్శిస్తారని, అయితే తాము ఓట్ల చోరులకు వ్యతిరేకంగా మహాభారతాన్ని చూపిస్తున్నామని అన్నారు. మహాభారతంలోని పాచికల ఆటను ప్రస్తావిస్తూ, మోదీని శకునితో పోల్చారు. జ్ఞానేశ్‌ కుమార్‌ ఆయన చేతిలో పాచికలా వ్యవహరిస్తూ, ఆయన చెప్పినట్లు నడుచుకుంటున్నారని ఆరోపించారు.

జ్ఞానేశ్‌ కుమార్‌పై దేశద్రోహం కేసు నమోదు చేసి, జైలుకు పంపాలని తేజస్వీ డిమాండ్‌ చేశారు. ఓటర్లను మోసం చేసేవారి నుంచి ప్రజాస్వామ్య హక్కులను కాపాడేందుకు తాము పోరాటం చేస్తున్నామని పేర్కొన్నారు. ఓట్ల చోరీ ఆరోపణలు, ఎన్నికల అధికారుల పాత్రపై కొనసాగుతున్న రాజకీయ చర్చ నేపథ్యంలో తేజస్వీ చేసిన ఈ వ్యాఖ్యలు ప్రాధాన్యం సంతరించుకున్నాయి. అయితే మోదీ, జ్ఞానేశ్‌ కుమార్‌పై చేసినవి తేజస్వీ రాజకీయ ఆరోపణలు మాత్రమే.