బిగ్ బాస్ తెలుగు 10లో బిగ్ ట్విస్ట్.. డబుల్ ఎలిమినేషన్‌తో పాటు వైల్డ్ కార్డ్స్?

బిగ్ బాస్ తెలుగు 10లో రోజురోజుకూ ఉత్కంఠ మరింత పెరుగుతోంది. కంటెస్టెంట్ల మధ్య గొడవలు, ఎమోషన్స్, మైండ్ గేమ్స్‌తో హౌస్ హీటెక్కుతోంది. ప్రస్తుతం నాలుగో వారం ముగింపు దశకు చేరుకోవడంతో ఈ వారం జరగనున్న డబుల్ ఎలిమినేషన్‌తో పాటు రాబోయే వైల్డ్ కార్డ్ ఎంట్రీలపై ప్రేక్షకులు, నెటిజన్లలో ఆసక్తి నెలకొంది. ముఖ్యంగా అక్టోబర్ రెండో వారంలో కొత్త కంటెస్టెంట్లు హౌస్‌లోకి అడుగుపెట్టే అవకాశం ఉందనే ప్రచారం జోరుగా సాగుతోంది. అయితే దీనిపై బిగ్ బాస్ టీమ్ నుంచి అధికారిక ప్రకటన రావాల్సి ఉంది. ఈ వైల్డ్ కార్డ్ రేసులో ‘రన్ రాజా రన్’ ఫేమ్ సీరత్ కపూర్, డ్యాన్సర్ నీతు, తెలుగు ఎన్‌ఆర్‌ఐ బ్లాగర్ మౌనీషా చౌదరి, గతంలో ‘బిగ్ బాస్ అగ్నిపరీక్ష 2’లో కనిపించిన రామకృష్ణ పేర్లు వినిపిస్తున్నాయి. వీరితో పాటు సోనియా సింగ్, సౌందర్య రెడ్డి, జబర్దస్త్ కమెడియన్ నూకరాజు, రాకింగ్ రాకేష్ పేర్లు కూడా సోషల్ మీడియాలో చక్కర్లు కొడుతున్నాయి.

మరోవైపు నాలుగో వారం నామినేషన్స్‌లో ముకేశ్ గౌడ, త్రిగుణ్, దేబ్జానీ, రోహిత్, షాలిని, అమన్, నరేష్, చరణ్, సృష్టి ఉన్నారు. నామినేషన్ ప్రక్రియలో త్రిగుణ్–రోహిత్, ముకేశ్–అపూర్వ మధ్య విభేదాలు మరోసారి హీట్ పెంచాయి. గత వారం ఎలిమినేషన్ జోన్‌లో ఉన్న వర్షిణిని కెప్టెన్‌గా ఉన్న ముకేశ్ తన కెప్టెన్సీ, ఇమ్యూనిటీని వదులుకుని ఎలిమినేషన్ నుంచి సేవ్ చేశాడు. అయితే ఇప్పుడు వర్షిణి తక్కువ ఓటింగ్‌తో డేంజర్ జోన్‌లో ఉన్నట్లు ప్రచారం జరుగుతోంది. హౌస్‌లో ఆశించిన స్థాయిలో టాస్క్‌లు ఆడకపోవడం, ముకేశ్ పట్ల ఆమె ప్రవర్తనపై సోషల్ మీడియాలో వచ్చిన విమర్శలు దీనికి కారణాలుగా చర్చకు వస్తున్నాయి. వర్షిణితో పాటు చరణ్, సృష్టి పేర్లు కూడా డేంజర్ జోన్‌లో వినిపిస్తున్నాయి. ఈ వారం డబుల్ ఎలిమినేషన్ ఉంటుందనే ప్రచారం నేపథ్యంలో చివరి నిమిషంలో బిగ్ బాస్ ఎలాంటి నిర్ణయం తీసుకుంటారనేది ఆసక్తికరంగా మారింది. ఒకవేళ వైల్డ్ కార్డ్ ఎంట్రీలు భారీగా జరిగితే, ఇప్పటికే ఏర్పడిన గ్రూపులు, ఫ్రెండ్‌షిప్స్, గొడవల సమీకరణాలు మారే అవకాశం ఉంది. కొత్త కంటెస్టెంట్లు ఎవరిని టార్గెట్ చేస్తారు, ఏ గ్రూపులో చేరతారు, ప్రస్తుత కంటెస్టెంట్ల గేమ్‌పై ఎలాంటి ప్రభావం చూపుతారనే చర్చ మొదలైంది.