బిగ్ బాస్ బజ్‌లో శివాజీ వర్సెస్ అపూర్వ...

బిగ్ బాస్ తెలుగు సీజన్ 10 ఐదో వారంలో అపూర్వ, చరణ్ ఎలిమినేట్ కాగా.. ఐదుగురు వైల్డ్ కార్డ్ కంటెస్టెంట్లు హౌస్‌లోకి ప్రవేశించారు. ఎలిమినేషన్ తర్వాత అపూర్వ, శివాజీ హోస్ట్ చేస్తున్న బిగ్ బాస్ బజ్ ఇంటర్వ్యూలో పాల్గొంది. ఈ సందర్భంగా వీరిద్దరి మధ్య హౌస్‌లో అపూర్వ ప్రవర్తన, ఆటతీరుపై వాడీవేడిగా చర్చ జరిగింది. హౌస్‌లో అందరికీ గౌరవం ఇచ్చానని చెబుతున్న అపూర్వకు వ్యతిరేకంగా సభ్యులు ఎందుకు ఓటు వేశారని శివాజీ ప్రశ్నించారు. దీనికి అపూర్వ స్పందిస్తూ, తాను తన వ్యక్తిత్వాన్ని మార్చుకోలేదని, 14 మంది ఒకవైపు ఉండటంతో తన గొంతు గట్టిగా వినిపించాల్సి వచ్చిందని వివరించింది. ఎవరినీ దూషించలేదని, తన ప్రవర్తన వెనుక పరిస్థితులు కూడా ఉన్నాయని చెప్పుకొచ్చింది.

రోహిత్, షాలినీ మధ్య ఉన్న అనుబంధం గురించి అపూర్వ చేసిన వ్యాఖ్యలపైనా శివాజీ ప్రశ్నలు సంధించారు. తొందరపాటుతో స్పందించడం వల్ల అపార్థాలు ఏర్పడ్డాయని అభిప్రాయపడ్డారు. అయితే, షాలినీతో తనకు వ్యక్తిగత విభేదాలు లేవని, రోహిత్‌తో ఆమె అనుబంధంలో జోక్యం చేసుకోవాలనే ఉద్దేశం తనకు లేదని అపూర్వ స్పష్టం చేసింది. తన వ్యక్తిగత జీవితం గురించి కూడా మాట్లాడుతూ, చదువు, దుస్తులు, ఇతర నిర్ణయాల్లో కుటుంబ సభ్యుల నియంత్రణ తనకు నచ్చలేదని వెల్లడించింది. బిగ్ బాస్ హౌస్‌లోకి కేవలం టైటిల్ గెలవడానికే కాకుండా, ప్రేక్షకుల మనసులు గెలుచుకోవడానికి కూడా వచ్చానని తెలిపింది. తనపై ప్రేక్షకుల తీర్పును గౌరవిస్తానని, ఇకపై మరింత మెరుగైన అపూర్వగా అందరి ముందుకు వస్తానని చెప్పింది.