ఆసియా క్రీడల్లో భారత్‌కు మరో పతకం.. ఫైనల్‌కు జ్యోతి సురేఖ బృందం

ఆసియా క్రీడల్లో కాంపౌండ్ ఆర్చరీ టీమ్ ఈవెంట్‌లో భారత్‌కు పతకం ఖాయమైంది. విజయవాడకు చెందిన జ్యోతి సురేఖ వెన్నం, పెద్దపల్లికి చెందిన చికితా రావు, మహారాష్ట్రకు చెందిన ప్రితికతో కూడిన భారత త్రయం సెమీఫైనల్లో కొరియాతో హోరాహోరీగా తలపడింది. ఉత్కంఠభరితంగా సాగిన పోరులో భారత ఆర్చర్లు 234-233తో కొరియాపై అద్భుత విజయం సాధించారు.

సెమీఫైనల్లో విజయం సాధించడంతో భారత జట్టు ఫైనల్‌కు దూసుకెళ్లింది. దీంతో భారత్‌కు ఈ ఈవెంట్‌లో కనీసం రజత పతకం ఖాయమైంది. ఇప్పుడు స్వర్ణ పతకం కోసం భారత త్రయం ఫైనల్‌లో పోటీ పడనుంది. ఫైనల్ ఫలితంతో భారత్‌కు స్వర్ణమా, రజతమా అన్నది తేలనుంది. కాంపౌండ్ ఆర్చరీలో భారత క్రీడాకారిణులు మరోసారి అంతర్జాతీయ వేదికపై తమ ప్రతిభను చాటారు.