యూత్ ఒలింపిక్స్‌లో భారత్‌కు డబుల్ ధమాకా..

డాకర్ యూత్ ఒలింపిక్స్‌లో భారత్‌కు బాక్సింగ్ రూపంలో రెండు స్వర్ణ పతకాలు లభించాయి. పోటీలు ప్రారంభమై చాలా రోజులైనా బుధవారం వరకు భారత్ ఖాతాలో ఎనిమిది పతకాలే ఉన్నాయి. అందులో ఐదు కాంస్యాలే కావడంతో స్వర్ణంపై ఆశలు సన్నగిల్లాయి. పోటీలు ముగియడానికి ఒక్కరోజు ముందు భారత బాక్సర్లు అంబేకర్, గుంజన్ అద్భుత ప్రదర్శనతో పసిడి పతకాలు సాధించి దేశానికి గర్వకారణంగా నిలిచారు. గురువారం జరిగిన పురుషుల 50 కేజీల ఫైనల్లో అంబేకర్ 3-2తో ఐర్లాండ్‌కు చెందిన క్రిస్టియన్ జుబానిని ఓడించాడు. ఆరంభం నుంచి చివరి వరకు హోరాహోరీగా సాగిన ఈ పోరులో విజేత ఎవరన్నది చివరి క్షణం వరకు ఉత్కంఠ రేపింది. చివరకు న్యాయ నిర్ణేతలు అంబేకర్‌కు అనుకూలంగా తీర్పునివ్వడంతో భారత్‌కు స్వర్ణం దక్కింది. యూత్ ఒలింపిక్స్ బాక్సింగ్‌లో భారత్‌కు ఇదే తొలి స్వర్ణ పతకం కావడం విశేషం.

మహిళల 48 కేజీల ఫైనల్లో 17 ఏళ్ల హరియాణా బాక్సర్ గుంజన్ అద్భుత ఆధిపత్యం ప్రదర్శించింది. అల్జీరియాకు చెందిన బౌతైనా బెన్సాలాను 5-0తో చిత్తు చేసి మరో స్వర్ణాన్ని భారత్ ఖాతాలో వేసింది. పోరు ప్రారంభం నుంచే దూకుడుగా ఆడిన గుంజన్.. ప్రత్యర్థికి ఏమాత్రం అవకాశం ఇవ్వకుండా విజయం సాధించింది. దీంతో యూత్ ఒలింపిక్స్ బాక్సింగ్‌లో స్వర్ణం గెలిచిన తొలి భారత మహిళా బాక్సర్‌గా చరిత్ర సృష్టించింది. గతంలో 2010 యూత్ ఒలింపిక్స్‌లో శివ థాపా ఫైనల్‌కు చేరి రజతంతో సరిపెట్టుకోగా.. వికాస్ క్రిషన్ కాంస్య పతకం సాధించాడు. తాజాగా అంబేకర్, గుంజన్ సాధించిన రెండు స్వర్ణాలతో పతకాల పట్టికలో భారత్ 16వ స్థానానికి చేరింది. ప్రస్తుతం భారత్ ఖాతాలో రెండు స్వర్ణాలు, మూడు రజతాలు, ఐదు కాంస్యాలు కలిపి మొత్తం 10 పతకాలు ఉన్నాయి. 17 స్వర్ణాలు, ఎనిమిది రజతాలు, ఏడు కాంస్యాలతో మొత్తం 32 పతకాలు సాధించిన చైనా అగ్రస్థానంలో కొనసాగుతోంది.