

ఇండోనేషియాలోని బాలిలో జరిగిన బోర్డు సమావేశంలో 2027 నుంచి 2035 వరకు జరగనున్న ప్రధాన అంతర్జాతీయ క్రికెట్ టోర్నమెంట్ల క్యాలెండర్ను అంతర్జాతీయ క్రికెట్ మండలి (ఐసీసీ) అధికారికంగా ఖరారు చేసింది. ఈ షెడ్యూల్ ప్రకారం 2029 అక్టోబర్ 9 నుంచి 28 వరకు జరిగే పురుషుల ఛాంపియన్స్ ట్రోఫీకి భారత్ ఒక్కటే ఆతిథ్యం ఇవ్వనుంది. 2031 అక్టోబర్ 9 నుంచి నవంబర్ 23 వరకు జరిగే పురుషుల వన్డే ప్రపంచకప్ను భారత్, బంగ్లాదేశ్ సంయుక్తంగా నిర్వహించనున్నాయి. ఇక 2027 వన్డే ప్రపంచకప్ అక్టోబర్ 7 నుంచి నవంబర్ 21 వరకు దక్షిణాఫ్రికా, జింబాబ్వే, నమీబియా దేశాల్లో జరగనుంది. టీ20 ఫార్మాట్లో 2028 ప్రపంచకప్కు అక్టోబర్ 12 నుంచి నవంబర్ 12 వరకు ఆస్ట్రేలియా, న్యూజిలాండ్ ఆతిథ్యం ఇవ్వనున్నాయి. 2030 టీ20 ప్రపంచకప్ జులై 4 నుంచి ఆగస్టు 4 వరకు ఇంగ్లండ్, స్కాట్లాండ్, ఐర్లాండ్ దేశాల్లో నిర్వహించనున్నారు.
టెస్ట్ క్రికెట్లో అత్యున్నత టోర్నీ అయిన వరల్డ్ టెస్ట్ ఛాంపియన్షిప్ (డబ్ల్యూటీసీ) ఫైనల్స్ షెడ్యూల్ను కూడా ఐసీసీ ప్రకటించింది. 2027 ఫైనల్ జూన్ 9 నుంచి 13 వరకు ఇంగ్లండ్లోని ది ఓవల్ మైదానంలో జరగనుంది. 2029 ఫైనల్ జూన్ 8 నుంచి 12 వరకు, 2031 ఫైనల్ జూన్ 12 నుంచి 16 వరకు ఇంగ్లండ్లోనే నిర్వహించనున్నారు. అయితే 2032, 2034 టీ20 ప్రపంచకప్లు, 2033 ఛాంపియన్స్ ట్రోఫీ, 2035 వన్డే ప్రపంచకప్తో పాటు 2033, 2035 డబ్ల్యూటీసీ ఫైనల్స్కు ఆతిథ్యమిచ్చే దేశాలను ఇంకా ఖరారు చేయాల్సి ఉంది. మరోవైపు 2028 లాస్ ఏంజిల్స్ ఒలింపిక్స్లో క్రికెట్ తిరిగి ప్రవేశించనున్న నేపథ్యంలో చివరి అర్హత పోటీల వివరాలను కూడా ఐసీసీ వెల్లడించింది. పురుషుల ఒలింపిక్ క్వాలిఫయర్ పోటీలు 2028 ఫిబ్రవరి 5 నుంచి 13 వరకు అమెరికాలో, మహిళల క్వాలిఫయర్ పోటీలు ఫిబ్రవరి 26 నుంచి మార్చి 5 వరకు బంగ్లాదేశ్లో జరగనున్నాయి. 2027 వన్డే ప్రపంచకప్తో పాటు 2028 పురుషుల, మహిళల టీ20 ప్రపంచకప్లకు సంబంధించిన అర్హత పోటీల విధానాలను కూడా ఐసీసీ ప్రకటించింది. దీంతో రాబోయే దశాబ్దంలో అంతర్జాతీయ క్రికెట్ అభిమానులకు పలు కీలక టోర్నీలు కనువిందు చేయనున్నాయి.





















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!