ఆసియా క్రీడల్లో భారత ఆర్చర్ల గోల్డ్‌ హ్యాట్రిక్‌..

2026 ఆసియా క్రీడల్లో భారత ఆర్చర్లు అద్భుత ప్రదర్శన చేశారు. జపాన్‌లో జరుగుతున్న ఈ క్రీడల్లో ఒకే రోజు మూడు స్వర్ణ పతకాలు సాధించి సత్తా చాటారు. తొలుత మహిళల కాంపౌండ్‌ టీమ్‌ ఈవెంట్‌లో జ్యోతి సురేఖ వెన్నం, చికితా తణిపర్తి, ప్రీతికా ప్రదీప్‌ త్రయం చైనాను 238-234తో ఓడించి స్వర్ణం సాధించింది. ఈ స్కోరు దక్షిణ కొరియా నెలకొల్పిన ప్రపంచ రికార్డును సమం చేయడం విశేషం.

ఆ తర్వాత మిక్స్‌డ్‌ టీమ్‌, పురుషుల టీమ్‌ ఈవెంట్లలోనూ భారత్‌ పసిడి పతకాలు సాధించింది. చికితా తణిపర్తి, సాహిల్‌ జాదవ్‌ జోడీ దక్షిణ కొరియాపై 157-157తో సమంగా నిలిచిన తర్వాత షూట్‌ఆఫ్‌లో 20-19తో విజయం సాధించింది. అనంతరం కుషాల్‌ దలాల్‌, సాహిల్‌ జాదవ్‌, గణేశ్‌ మణిరత్నం తిరుమూరు త్రయం పురుషుల కాంపౌండ్‌ టీమ్‌ ఫైనల్లో చైనాను 238-237తో ఓడించి భారత్‌కు మూడో స్వర్ణాన్ని అందించింది.