జూనియర్ ఆసియా కప్ హాకీలో భారత్ జోరు..

జూనియర్ ఆసియా కప్ హాకీ టోర్నమెంట్‌లో భారత జట్టు అద్భుత ప్రదర్శన కొనసాగిస్తోంది. మంగళవారం జరిగిన పూల్-ఎ మ్యాచ్‌లో కెప్టెన్ అన్మోల్ ఎక్కా రెండు గోల్స్‌తో మెరవడంతో భారత్ 7-3తో కొరియాపై ఘన విజయం సాధించింది. అన్మోల్‌తో పాటు లవ్‌నూర్ సింగ్, అజీత్ సింగ్, ప్రభ్‌దీప్ సింగ్, గురుసేవక్ సింగ్, ఆర్యన్ గోల్స్ సాధించారు. మూడు క్వార్టర్ల వరకు ఇరు జట్లు హోరాహోరీగా తలపడగా స్కోరు 3-3గా నిలిచింది. అయితే చివరి క్వార్టర్‌లో భారత ఆటగాళ్లు దాడులను మరింత తీవ్రతరం చేసి నాలుగు గోల్స్ సాధించి విజయాన్ని ఖాయం చేసుకున్నారు.

మూడు మ్యాచ్‌ల్లో రెండు విజయాలు, ఒక డ్రాతో ఏడు పాయింట్లు సాధించిన భారత్ పూల్-ఎలో అగ్రస్థానంలో కొనసాగుతోంది. బుధవారం చైనీస్ తైపీపై విజయం సాధిస్తే సెమీఫైనల్ బెర్త్ ఖరారు చేసుకునే అవకాశం ఉంది. మరోవైపు మహిళల టోర్నీలో భారత అమ్మాయిల జట్టు కూడా సత్తా చాటింది. ఎలైట్ పూల్ మ్యాచ్‌లో జపాన్‌ను 7-0తో చిత్తు చేసి క్వార్టర్‌ఫైనల్‌కు దూసుకెళ్లింది. కృష్ణ శర్మ, సుప్రియ, పూర్ణిమ యాదవ్, గీత యాదవ్, సనిక భారత్ తరఫున గోల్స్ సాధించారు. మూడు మ్యాచ్‌ల్లోనూ గెలిచి తొమ్మిది పాయింట్లతో పూల్‌లో అగ్రస్థానంలో నిలిచిన భారత్ క్వార్టర్స్‌కు చేరింది.