ఇద్దరు బీఆర్‌ఎస్ ఎమ్మెల్సీలపై చర్యలకు ఎథిక్స్ కమిటీకి రిఫర్...

తెలంగాణ శాసనసభ స్పీకర్ గడ్డం ప్రసాద్ కుమార్‌పై చేసిన వ్యాఖ్యల నేపథ్యంలో బీఆర్‌ఎస్ ఎమ్మెల్సీలు తాతా మధు, నవీన్ రెడ్డిలపై చర్యలు తీసుకోవాలని కోరుతూ శాసనసభలో ఆమోదించిన తీర్మానాన్ని ఎథిక్స్ కమిటీకి రిఫర్ చేశారు. ఇటీవల శాసనసభలో ఈ మేరకు తీర్మానం చేయగా.. అనంతరం దాన్ని మండలి చైర్మన్ గుత్తా సుఖేందర్ రెడ్డికి పంపించారు. తీర్మానాన్ని పరిశీలించిన మండలి చైర్మన్.. తదుపరి పరిశీలన, చర్యల కోసం ఈ అంశాన్ని ఎథిక్స్ కమిటీకి పంపించారు.

ప్రజాజీవితంలో ఉన్నవారు బాధ్యతాయుతంగా వ్యవహరించాల్సిన అవసరం ఉందని శాసనసభలో చేసిన తీర్మానంలో పేర్కొన్నారు. అలాగే ఇద్దరు ఎమ్మెల్సీలు చేసిన వ్యాఖ్యలపై బీఆర్‌ఎస్ అధినేత కేసీఆర్ క్షమాపణ చెప్పాలని కూడా సభ తీర్మానించింది. ప్రస్తుతం ఈ వ్యవహారం ఎథిక్స్ కమిటీ పరిశీలనకు వెళ్లడంతో.. కమిటీ సిఫార్సుల ఆధారంగా తదుపరి చర్యలు ఉండే అవకాశం ఉంది.