అవార్డుగా వచ్చిన స్మార్ట్‌ఫోన్‌ను మహిళా అధికారిణికి బహుమతిగా ఇచ్చిన కేఎల్ రాహుల్

న్యూజిలాండ్‌తో మూడో వన్డే కోసం టీమిండియా హామిల్టన్‌కు చేరుకుంది. ఈ క్రమంలో భారత స్టార్ బ్యాటర్, వికెట్ కీపర్ కేఎల్ రాహుల్ తన మంచి మనసుతో అందరి ప్రశంసలు అందుకుంటున్నాడు. రెండో వన్డేలో గేమ్ ఛేంజర్ అవార్డును అందుకున్న రాహుల్‌కు బహుమతిగా స్మార్ట్‌ఫోన్ లభించింది. అయితే ఆ ఫోన్‌ను తన వద్ద ఉంచుకోకుండా ఓ మహిళా అధికారిణికి బహుమతిగా ఇచ్చి ఆమెను ఆశ్చర్యపరిచాడు. అనూహ్యంగా అందిన ఈ కానుకతో తొలుత షాక్‌కు గురైన ఆమె, ఆ తర్వాత ఎంతో సంతోషం వ్యక్తం చేసింది. ఈ ఘటనకు సంబంధించిన వీడియోను బీసీసీఐ తన అధికారిక సోషల్ మీడియా ఖాతాలో పంచుకుంది. ఈ వీడియోలో మహిళా అధికారిణి మాట్లాడుతూ.. కేఎల్ రాహుల్ తనకు స్మార్ట్‌ఫోన్ బహుమతిగా ఇచ్చినప్పుడు ఒక్కసారిగా ఆశ్చర్యపోయానని, ఆయన మంచి మనసుకు ఈ సంఘటనే నిదర్శనమని పేర్కొన్నారు.

ఈ వీడియోకు బీసీసీఐ 'గొప్ప ఆటగాడు.. అంతకంటే గొప్ప మనసు' అనే క్యాప్షన్ జత చేసింది. ప్రస్తుతం ఈ వీడియో నెటిజన్ల దృష్టిని ఆకర్షిస్తోంది. మైదానంలో తన బ్యాటింగ్‌తో ఆకట్టుకునే రాహుల్, మైదానం వెలుపల కూడా తన ఉదారతతో అభిమానుల మనసులు గెలుచుకుంటున్నాడంటూ పలువురు ప్రశంసిస్తున్నారు. అవార్డుగా వచ్చిన బహుమతిని మరొకరికి ఇచ్చి ఆనందాన్ని పంచుకోవడం అభినందనీయమని కామెంట్లు చేస్తున్నారు.