గ్రాండ్ చెస్ టూర్ ఫైనల్‌కు ప్రజ్ఞానంద..

సెయింట్ లూయిస్‌లో జరుగుతున్న 2026 గ్రాండ్ చెస్ టూర్ ఫైనల్స్‌లో భారత గ్రాండ్‌మాస్టర్ ఆర్. ప్రజ్ఞానంద అద్భుత ప్రదర్శనతో ఫైనల్‌కు చేరుకున్నాడు. జర్మనీకి చెందిన విన్సెంట్ కీమర్‌పై 19-9తో ఘన విజయం సాధించాడు. రెండో క్లాసికల్ గేమ్‌లో విజయం సాధించి ఆరు పాయింట్ల ఆధిక్యంతో ర్యాపిడ్, బ్లిట్జ్ దశలోకి అడుగుపెట్టిన ప్రజ్ఞానంద.. రెండు ర్యాపిడ్ గేమ్‌ల్లోనూ కీమర్‌ను ఓడించి 17-3తో తిరుగులేని ఆధిక్యం సాధించాడు. అనంతరం తొలి బ్లిట్జ్ గేమ్‌లోనూ విజయం సాధించి 19 పాయింట్లకు చేరుకున్నాడు. దీంతో మూడు గేమ్‌లు మిగిలుండగానే ఫైనల్ బెర్త్ ఖరారైంది. అయితే టోర్నీ నిబంధనల ప్రకారం మిగిలిన మూడు బ్లిట్జ్ గేమ్‌లు కూడా ఆడాల్సి ఉండటంతో వాటన్నింటినీ కీమర్ గెలిచి తుది స్కోరును 19-9గా నిలిపాడు.

మరో సెమీఫైనల్‌లో అమెరికా గ్రాండ్‌మాస్టర్ ఫాబియానో కరువానా 18-12తో వెస్లీ సోపై విజయం సాధించి ఫైనల్‌కు చేరుకున్నాడు. దీంతో టైటిల్ కోసం ప్రజ్ఞానంద, కరువానా తలపడనున్నారు. డిఫెండింగ్ ఛాంపియన్‌గా ఉన్న కరువానా వరుసగా మరోసారి టైటిల్ సాధించాలని చూస్తుండగా.. ప్రజ్ఞానంద తన తొలి గ్రాండ్ చెస్ టూర్ ఫైనల్స్ టైటిల్‌పై కన్నేశాడు. మరోవైపు మూడో స్థానం కోసం విన్సెంట్ కీమర్, వెస్లీ సో పోటీపడనున్నారు. ఈ మ్యాచ్‌లో విజేతకు 2027 గ్రాండ్ చెస్ టూర్‌కు నేరుగా అర్హత లభిస్తుంది.