డెన్మార్క్ ఓపెన్‌ నుంచి పీవీ సింధు నిష్క్రమణ

భారత స్టార్‌ షట్లర్‌ పీవీ సింధుకు డెన్మార్క్‌ ఓపెన్‌లో నిరాశ ఎదురైంది. మంగళవారం జరిగిన మహిళల సింగిల్స్‌ తొలి రౌండ్‌లో జర్మనీకి చెందిన యోనె లి చేతిలో ఆమె పరాజయం పాలైంది. హోరాహోరీగా సాగిన ఈ పోరులో సింధు తొలి గేమ్‌ను 21-13తో గెలుచుకుంది. అయితే రెండో గేమ్‌లో 23-25తో ఓడిపోయింది. నిర్ణయాత్మక మూడో గేమ్‌లోనూ 19-21తో పరాజయం పాలై టోర్నీ నుంచి నిష్క్రమించింది. మరోవైపు, భారత యువ షట్లర్‌ తన్వీ శర్మ శుభారంభం చేసింది. తొలి రౌండ్‌లో జపాన్‌ క్రీడాకారిణి నత్సుకి నిదైరాపై 21-17, 16-21, 21-19తో విజయం సాధించి తదుపరి రౌండ్‌కు అర్హత సాధించింది.

పురుషుల సింగిల్స్‌లో భారత ఆటగాడు లక్ష్యసేన్‌కు కూడా తొలి రౌండ్‌లోనే ఎదురుదెబ్బ తగిలింది. చైనీస్‌ తైపీకి చెందిన చౌ తీన్‌ చెన్‌ చేతిలో 18-21, 21-13, 15-21తో ఓడిపోయి టోర్నీ నుంచి నిష్క్రమించాడు. అయితే మరో భారత షట్లర్‌ కిదాంబి శ్రీకాంత్‌ రెండో రౌండ్‌లోకి ప్రవేశించాడు. తొలి రౌండ్‌లో ఫ్రాన్స్‌కు చెందిన అర్నాడ్‌ మెర్కల్‌ను 22-20, 21-19తో వరుస గేముల్లో ఓడించాడు. దీంతో డెన్మార్క్‌ ఓపెన్‌లో భారత షట్లర్లకు మిశ్రమ ఫలితాలు లభించాయి.