ఐసీసీ ప్లేయర్‌ ఆఫ్‌ ద మంత్‌గా శుభ్‌మన్‌ గిల్‌, షెఫాలీ వర్మ

భారత వన్డే, టెస్టు జట్ల కెప్టెన్‌ శుభ్‌మన్‌ గిల్‌, మహిళల జట్టు ఓపెనర్‌ షెఫాలీ వర్మ ఐసీసీ సెప్టెంబర్‌ నెల ఉత్తమ ప్లేయర్‌ అవార్డులను సొంతం చేసుకున్నారు. ఈ పురస్కారాన్ని గెలుచుకోవడం గిల్‌కు ఇది ఐదోసారి. వెస్టిండీస్‌ ఆల్‌రౌండర్‌ హేలీ మాథ్యూస్‌ తర్వాత ఐదుసార్లు ఈ అవార్డును అందుకున్న రెండో క్రికెటర్‌గా గిల్‌ నిలిచాడు. అంతర్జాతీయ క్రికెట్‌లో తన స్థాయిని మరోసారి చాటుకుంటూ ఈ అరుదైన ఘనత సాధించాడు.

మహిళల ఆసియా కప్‌లో అద్భుత ప్రదర్శన చేసిన 22 ఏళ్ల షెఫాలీ వర్మ మహిళల విభాగంలో ఉత్తమ ప్లేయర్‌గా ఎంపికైంది. ఈ టోర్నీలో ఆమె 360 పరుగులతో అత్యధిక పరుగులు చేసిన బ్యాటర్‌గా నిలవడంతో పాటు ఆరు వికెట్లు కూడా పడగొట్టింది. గతేడాది నవంబర్‌లోనూ షెఫాలీ ఈ అవార్డును గెలుచుకుంది. పురుషులు, మహిళల విభాగాల్లో ఒకే దేశానికి చెందిన క్రికెటర్లు ఒకే నెలలో ఐసీసీ అవార్డులు అందుకోవడం ఇది ఐదోసారి. భారత్‌కు ఈ ఘనత దక్కడం మూడోసారి. గతంలో 2024లో జస్‌ప్రీత్‌ బుమ్రా, స్మృతి మంధాన, 2025లో అభిషేక్‌ శర్మ, స్మృతి మంధాన ఈ పురస్కారాలను ఒకేసారి అందుకున్నారు.