TG20 క్రికెట్ లీగ్‌ షురూ

తెలంగాణలోని యువ క్రికెటర్ల ప్రతిభను వెలికితీసి వారికి పెద్ద వేదిక కల్పించాలనే లక్ష్యంతో హైదరాబాద్ క్రికెట్ అసోసియేషన్ (HCA) ప్రతిష్టాత్మకంగా TG20 లీగ్‌ను ప్రారంభిస్తోంది. గల్లీ క్రికెట్ నుంచి రాష్ట్ర స్థాయి వరకు ప్రతిభ కనబరిచే యువ ఆటగాళ్లకు ఈ లీగ్ గొప్ప అవకాశంగా నిలవనుంది. ఈ టోర్నమెంట్‌కు యూత్ ఐకాన్ విజయ్ దేవరకొండ బ్రాండ్ అంబాసిడర్‌గా వ్యవహరించడంతో లీగ్‌పై మరింత ఆసక్తి నెలకొంది.

TG20 అధికారిక ఆంథెమ్ ‘తెలంగాణ, మానా క్రికెట్ షురూ!’ను సోషల్ మీడియాలో పంచుకున్న విజయ్ దేవరకొండ, భారత జట్టులో తెలుగు ఆటగాళ్లు ప్రాతినిధ్యం వహించిన ప్రతిసారీ గర్వంగా అనిపిస్తుందని పేర్కొన్నారు. తెలంగాణ నుంచి మరింత మంది క్రికెటర్లు జాతీయ, అంతర్జాతీయ స్థాయికి ఎదగాలని ఆశాభావం వ్యక్తం చేశారు. భోలే శావళి రచించి, ఆలపించిన ఈ ఆంథెమ్ తెలంగాణ సంస్కృతి, క్రికెట్ పట్ల యువతలో ఉన్న మక్కువను ప్రతిబింబిస్తూ విశేష ఆదరణ పొందుతోంది.