ఐఫోన్ 18 లాంచ్ డేట్‌పై ఆపిల్ బిగ్ హింట్..

ఆపిల్ తన వార్షిక సెప్టెంబర్ లాంచ్ ఈవెంట్‌కు సన్నాహాలు ప్రారంభించినట్లు సమాచారం. ఈ ఈవెంట్‌లో ఐఫోన్ 18 సిరీస్ను ఆవిష్కరించే అవకాశముందని నివేదికలు పేర్కొంటున్నాయి. ఈ సందర్భంగా అమెరికాలోని ఆపిల్ రిటైల్ ఉద్యోగుల కోసం ప్రత్యేక లాటరీ ప్రోగ్రామ్ను ప్రారంభించినట్లు సమాచారం. ఎంపికైన ఉద్యోగులు అతిథుల చెక్-ఇన్, క్యూ నిర్వహణ, దిశానిర్దేశం, భద్రతా బృందానికి సహకారం వంటి బాధ్యతలు నిర్వహించనున్నారు. దరఖాస్తుల గడువు ఆగస్టు 8, ఎంపికైన వారికి ఆగస్టు 17న సమాచారం అందజేయనున్నట్లు తెలుస్తోంది.

ఆపిల్ అధికారికంగా తేదీ ప్రకటించకపోయినా, ఈవెంట్ సెప్టెంబర్ తొలి పక్షంలో, ముఖ్యంగా సెప్టెంబర్ 9న జరిగే అవకాశం ఉందని నివేదికలు సూచిస్తున్నాయి. ఈ కార్యక్రమంలో ఐఫోన్ 18 ప్రో, ఐఫోన్ 18 ప్రో మ్యాక్స్, కొత్త ఆపిల్ వాచ్ మోడళ్లతో పాటు ఆపిల్ తొలి ఫోల్డబుల్ ఐఫోన్ను కూడా పరిచయం చేసే అవకాశముందని ప్రచారం జరుగుతోంది. అలాగే, కొత్త సీఈఓగా బాధ్యతలు స్వీకరించనున్న జాన్ టెర్నస్ నేతృత్వంలో జరిగే తొలి ప్రధాన ఉత్పత్తుల ఆవిష్కరణగా ఈ ఈవెంట్ నిలవొచ్చని నివేదికలు పేర్కొంటున్నాయి.