ఆపిల్‌లో మరోసారి ఉద్యోగ కోతలు.. ఫిట్‌నెస్ టీమ్‌పై ప్రభావం!

ప్రపంచ టెక్ దిగ్గజం ఆపిల్ మరోసారి ఉద్యోగ కోతలు చేపట్టినట్లు సమాచారం. గత లేఆఫ్స్‌కు సుమారు రెండు నెలల వ్యవధిలోనే తాజా కోతలు జరిగినట్లు నివేదికలు పేర్కొంటున్నాయి. బ్లూమ్‌బెర్గ్ నివేదికలను ఉటంకిస్తూ వచ్చిన వివరాల ప్రకారం, ఈసారి ఆపిల్ ఫిట్‌నెస్+ సబ్‌స్క్రిప్షన్ విభాగంలోని కొద్దిమంది ఉద్యోగులపై ప్రభావం పడింది. ముఖ్యంగా ఆపిల్ వాచ్ వినియోగదారులకు గైడెడ్ ఆడియో వర్కౌట్స్ అందించే టైమ్ టు వాక్, టైమ్ టు రన్ వంటి ఫీచర్లపై పనిచేసే బృందాలు ప్రభావితమైనట్లు తెలుస్తోంది.

ఫిట్‌నెస్+ కోసం కొత్త డిజిటల్ కంటెంట్‌ను నిరంతరం రూపొందించేందుకు అవుతున్న ఖర్చులు, సబ్‌స్క్రిప్షన్ వ్యాపారంపై ఉన్న ఒత్తిళ్ల నేపథ్యంలో ఆపిల్ తన ఖర్చులను పునఃసమీక్షిస్తున్నట్లు నివేదికలు చెబుతున్నాయి. అయితే ఫిట్‌నెస్+ సేవను పూర్తిగా నిలిపివేసే ఆలోచన లేదని సమాచారం. భవిష్యత్తులో ఫిట్‌నెస్+ను ఆపిల్ హెల్త్ యాప్‌తో మరింత అనుసంధానించే అవకాశాలు కూడా ఉన్నట్లు తెలుస్తోంది. ఇదిలా ఉండగా, గత ఆగస్టులో విజన్ ప్రో, సిరి, ఇతర సాఫ్ట్‌వేర్ బృందాలకు చెందిన 200 మందికి పైగా ఉద్యోగులపై కూడా కోతలు జరిగినట్లు నివేదికలు వెలువడ్డాయి.