భారత్‌కు మరో అణు బాహుబలి

భారత నౌకాదళం సముద్ర రక్షణ సామర్థ్యాన్ని మరింత బలోపేతం చేసే దిశగా అత్యాధునిక ఎస్-5 అణు జలాంతర్గామి నిర్మాణాన్ని వేగవంతం చేస్తోంది. సుమారు 13,500 టన్నుల బరువుతో రూపొందుతున్న ఈ నెక్స్ట్‌-జెన్‌ సబ్‌మెరైన్‌లో 190 మెగావాట్ల సామర్థ్యమున్న కాంపాక్ట్‌ లైట్‌ వాటర్‌ అణు రియాక్టర్‌తో పాటు 8,000 కిలోమీటర్లకు పైగా దూరాన్ని ఛేదించే కే-6 ఖండాంతర బాలిస్టిక్ క్షిపణులను మోసుకెళ్లే సామర్థ్యం ఉంటుంది. ఈ ప్రాజెక్టు కోసం సుమారు రూ.10 వేల కోట్ల వ్యయంతో విశాఖపట్నంలోని షిప్‌ బిల్డింగ్‌ సెంటర్‌, రాంబిల్లి సమీపంలోని ఐఎన్‌ఎస్‌ వర్ష నౌకాదళ స్థావరంలో నిర్మాణ పనులు కొనసాగుతున్నాయి.

అరిహంత్‌, అరిఘాత్‌, ఎస్-4 వంటి అణు జలాంతర్గాముల విజయాన్ని కొనసాగిస్తూ, మరింత శక్తివంతమైన ఎస్-5ను పూర్తిగా స్వదేశీ సాంకేతికతతో అభివృద్ధి చేస్తున్నారు. డీఆర్‌డీవో, బార్క్‌, అడ్వాన్స్‌డ్‌ టెక్నాలజీ వెసల్‌ (ఏటీవీ) సంయుక్తంగా రూపొందించిన ఈ జలాంతర్గామి భారత సముద్ర భద్రతకు కీలక బలంగా మారనుంది. ముఖ్యంగా హిందూ మహాసముద్ర ప్రాంతంలో వ్యూహాత్మక ఆధిపత్యాన్ని పెంచడంతో పాటు, శత్రు దేశాల కదలికలను సమర్థంగా ఎదుర్కొనే సామర్థ్యాన్ని భారత నౌకాదళానికి అందించనుంది.