టైటిల్స్ జియో ఏఐ స్మార్ట్ గ్లాసెస్‌.. ఫోన్ లేకుండానే యూపీఐ చెల్లింపులు

రిలయన్స్ జియో సరికొత్త ఏఐ ఆధారిత వేరబుల్ పరికరాలను ఆవిష్కరించింది. దిల్లీలో జరుగుతున్న ఇండియా మొబైల్ కాంగ్రెస్‌ 2026లో జియో ఏఐ స్మార్ట్ కెమెరా గ్లాసెస్‌, ఏఐ ఇయర్‌బడ్స్‌, ఏఐ ఆడియో గ్లాసెస్‌ను పరిచయం చేసింది. ఈ స్మార్ట్ గ్లాసెస్‌ ద్వారా క్యూఆర్‌ కోడ్‌ను చూస్తూ వాయిస్‌ కమాండ్ల సహాయంతో చెల్లింపులు చేయవచ్చని సంస్థ వెల్లడించింది. దీంతో ప్రతిసారీ ఫోన్‌ తీసి అన్‌లాక్‌ చేసి, క్యూఆర్‌ కోడ్‌ స్కాన్‌ చేయాల్సిన అవసరం ఉండదు.

ఈ గ్లాసెస్‌లో భారతీయ భాషల మధ్య ఏఐ ఆధారిత అనువాదం, ఫోన్‌ అవసరం లేకుండా లైవ్‌ క్రికెట్‌ కామెంటరీ వినడం, సమావేశాల్లో ముఖ్యమైన అంశాలను నోట్స్‌గా నమోదు చేసుకోవడం వంటి ఫీచర్లు ఉన్నాయి. యూపీఐ సర్కిల్‌ నిబంధనల ప్రకారం ఒక్కో లావాదేవీకి గరిష్ఠంగా రూ.5,000, నెలకు మొత్తం రూ.15,000 వరకు చెల్లింపులు చేయవచ్చని అందించిన సమాచారం పేర్కొంటోంది. జియో ఏఐ ఇయర్‌బడ్స్‌ ద్వారా నావిగేషన్‌ సమాచారాన్ని కూడా తెలుసుకోవచ్చు.