అందం వెనుక లక్షల కోట్ల వ్యాపారం...భారత్‌లో కొత్త ట్రెండ్

దేశంలో సౌందర్య ఉత్పత్తుల వినియోగం వేగంగా పెరుగుతోంది. ఈ మార్కెట్‌ విస్తరిస్తుండటంతో అంతర్జాతీయ సంస్థలు కూడా భారత మార్కెట్‌పై దృష్టి సారిస్తున్నాయి. ఫ్లిప్‌కార్ట్‌ విడుదల చేసిన 2026 వార్షిక బ్యూటీ ట్రెండ్స్ నివేదిక ప్రకారం ప్రస్తుతం 27 బిలియన్‌ డాలర్లుగా ఉన్న భారత సౌందర్య ఉత్పత్తుల మార్కెట్‌ 2030 నాటికి 45 శాతం వృద్ధితో 39 బిలియన్‌ డాలర్లకు, అంటే సుమారు రూ.3.70 లక్షల కోట్లకు చేరుకునే అవకాశం ఉంది.

గతంలో ప్రత్యేక సందర్భాల్లో మాత్రమే బ్యూటీ ప్రొడక్ట్స్ ను వినియోగించే వారు, ఇప్పుడు వాటిని నిత్యావసరంగా భావిస్తున్నారని నివేదిక పేర్కొంది. ఆత్మవిశ్వాసం, వ్యక్తిగత గుర్తింపు, స్వీయ సంరక్షణలో భాగంగా సౌందర్య ఉత్పత్తుల వినియోగం పెరుగుతోందని తెలిపింది. ఈ మార్పు దేశంలోని సౌందర్య ఉత్పత్తుల రంగానికి మరింత వృద్ధిని తీసుకురానుంది.