ఉద్యోగుల భవిష్య నిధిపై కేంద్రం కీలక నిర్ణయం

వేతన జీవులకు కేంద్ర ప్రభుత్వం కీలక నిర్ణయం తీసుకుంది. ఉద్యోగుల భవిష్య నిధి సంస్థ కింద తప్పనిసరి పరిధిలోకి వచ్చే వేతన పరిమితిని రూ.15 వేల నుంచి రూ.25 వేలకు పెంచేందుకు కేంద్ర మంత్రివర్గం ఆమోదం తెలిపింది. ఈ నిర్ణయం 2026 సెప్టెంబర్‌ 17 నుంచి అమల్లోకి రానుంది. దీంతో రూ.15 వేల నుంచి రూ.25 వేల మధ్య వేతనం పొందుతున్న మరిన్ని మంది ఉద్యోగులు భవిష్య నిధి, ఉద్యోగుల పింఛను, ఉద్యోగుల డిపాజిట్‌ ఆధారిత బీమా వంటి సామాజిక భద్రతా ప్రయోజనాల పరిధిలోకి రానున్నారు. ఈ మార్పుతో 51 లక్షలకు పైగా అదనపు ఉద్యోగులు ఉద్యోగుల భవిష్య నిధి సంస్థ పరిధిలోకి వచ్చే అవకాశం ఉందని కేంద్రం తెలిపింది.

వేతన పరిమితి పెరగడంతో అర్హులైన ఉద్యోగులు, యాజమాన్యాలు చెల్లించాల్సిన తప్పనిసరి చందాలు కూడా పెరగనున్నాయి. ఫలితంగా కొంతమేర చేతికి వచ్చే వేతనం తగ్గే అవకాశం ఉన్నప్పటికీ, దీర్ఘకాలంలో ఉద్యోగుల భవిష్య నిధి పొదుపు, పింఛను, బీమా భద్రత పెరగనుంది. ప్రస్తుతం ఉద్యోగుల డిపాజిట్‌ ఆధారిత బీమా పథకం కింద గరిష్ఠ బీమా మొత్తం రూ.7 లక్షలు కాగా, కొత్త వేతన పరిమితికి అనుగుణంగా నిబంధనలు మారితే ఇది సుమారు రూ.10.50 లక్షలకు చేరే అవకాశం ఉందని అంచనాలు ఉన్నాయి. అయితే ఈ మొత్తంపై తుది స్పష్టత అధికారిక ప్రకటన వెలువడిన తర్వాతే వస్తుంది.