పండగ వేళ ఈ–కామర్స్‌లో కొలువుల జాతర

దసరా నుంచి దీపావళి వరకు పండగ సీజన్‌ ఈ–కామర్స్‌ రంగానికి భారీ అవకాశాలను తీసుకురానుంది. ఈ కాలంలో దేశవ్యాప్తంగా సుమారు రూ.1.5 లక్షల కోట్ల విలువైన ఆన్‌లైన్‌ అమ్మకాలు జరిగే అవకాశం ఉందని అంచనా. పెరుగుతున్న ఆర్డర్లను అందుకునేందుకు ఈ–కామర్స్‌ సంస్థలు పెద్ద ఎత్తున నియామకాలు చేపడుతున్నాయి. క్విక్‌ కామర్స్‌ రంగం వేగంగా విస్తరిస్తుండటంతో పండగల వేళ ఉద్యోగ అవకాశాలు మరింత పెరగనున్నాయి.

ఈ ఏడాది ఈ–కామర్స్‌ రంగంలో ఉద్యోగ నియామకాలు 20 శాతం పెరిగి సుమారు 2.7 లక్షల మందికి ఉపాధి లభించే అవకాశం ఉందని అంచనా. ప్రముఖ ఈ–కామర్స్‌ సంస్థ అమెజాన్‌ ఇప్పటికే 400 పట్టణాల్లో 1.6 లక్షల మందిని నియమించుకున్నట్లు ప్రకటించింది. పండగల అమ్మకాలకు అనుగుణంగా డెలివరీ, గిడ్డంగులు, లాజిస్టిక్స్‌, కస్టమర్‌ సేవల విభాగాల్లో నియామకాలు పెరిగే అవకాశం ఉంది.