భారత్‌లో పెట్టుబడులకు ముందుకు రండి.. డచ్‌ పారిశ్రామికవేత్తలకు పీయూష్‌ గోయల్‌ పిలుపు

నెదర్లాండ్స్‌ పర్యటనలో ఉన్న కేంద్ర వాణిజ్య, పరిశ్రమల శాఖ మంత్రి పీయూష్‌ గోయల్‌.. భారత్‌లో పెట్టుబడులు పెట్టాలని డచ్‌ పారిశ్రామికవేత్తలకు పిలుపునిచ్చారు. ఇండియా–నెదర్లాండ్స్‌ బిజినెస్‌ ఫోరంలో మాట్లాడుతూ భారతీయుల పని సంస్కృతి, కష్టపడి పనిచేసే స్వభావాన్ని ప్రస్తావించారు. భారత్‌లో వ్యాపారాలు ప్రారంభిస్తే దేశంలోని కార్మిక శక్తి, అభివృద్ధి అవకాశాల ద్వారా సంస్థలు వృద్ధి సాధించగలవని పేర్కొన్నారు. ఆహార శుద్ధి రంగంలో పెట్టుబడులు పెట్టడం వల్ల రైతులకు మెరుగైన మార్కెట్‌ అవకాశాలు లభించడంతోపాటు వ్యవసాయ ఉత్పత్తులకు అదనపు విలువ చేకూరుతుందని వివరించారు.

పర్యటనలో భాగంగా నెదర్లాండ్స్‌కు చెందిన ప్రముఖ వ్యాపారవేత్తలతో గోయల్‌ సమావేశమై భారత్‌లో పెట్టుబడుల అవకాశాలను పరిశీలించాలని కోరారు. విదేశాంగ శాఖ వెల్లడించిన వివరాల ప్రకారం.. సెమీకండక్టర్లు, గ్రీన్‌ హైడ్రోజన్‌, స్వచ్ఛ ఇంధనం, కీలక ఖనిజాలు, అధునాతన తయారీ రంగాల్లో ఇరుదేశాల మధ్య సహకారంపై చర్చలు జరిగాయి. స్వేచ్ఛా వాణిజ్య ఒప్పందం (FTA) ద్వారా కొత్త వాణిజ్య, పెట్టుబడి అవకాశాలను అందిపుచ్చుకోవడంపైనా దృష్టి సారించారు. ప్రధాని నరేంద్ర మోదీ మే నెలలో నెదర్లాండ్స్‌ పర్యటన సందర్భంగా ఇరుదేశాల సంబంధాలను వ్యూహాత్మక భాగస్వామ్య స్థాయికి పెంచుకోవాలని నిర్ణయించినట్లు అందించిన సమాచారం పేర్కొంటోంది.