భారత ఆర్థిక వ్యవస్థపై మోదీ బిగ్‌ స్టేట్‌మెంట్‌

2026-27 ఆర్థిక సంవత్సరం తొలి త్రైమాసికంలో భారత్‌ 7.8 శాతం జీడీపీ వృద్ధిని నమోదు చేయడంపై ప్రధాని నరేంద్ర మోదీ హర్షం వ్యక్తం చేశారు. ఏప్రిల్‌-జూన్‌ త్రైమాసికంలో నమోదైన ఈ వృద్ధి మార్కెట్‌ అంచనాలు, ఆర్‌బీఐ అంచనాలను మించింది. ప్రపంచ అనిశ్చితులు, చమురు ధరల పెరుగుదల, సరఫరా గొలుసు సమస్యల మధ్య భారత ఆర్థిక వ్యవస్థ బలమైన వృద్ధిని సాధించడం ప్రజల సమిష్టి శక్తి, స్థైర్యానికి నిదర్శనమని మోదీ పేర్కొన్నారు.

సోషల్‌ మీడియా సందేశంలో మోదీ దేశ ఆర్థిక పరిస్థితిపై ప్రతికూల ప్రచారం చేస్తున్నవారిపై ‘జూత్‌ కీ గూంజ్‌’ అంటూ విమర్శలు చేశారు. ఈ వ్యాఖ్యలు కాంగ్రెస్‌ నేత రాహుల్‌ గాంధీ నిర్వహిస్తున్న ‘ఛాత్రోన్‌ కీ గూంజ్‌’ కార్యక్రమాన్ని ఉద్దేశించినవిగా రాజకీయ వర్గాల్లో చర్చ జరుగుతోంది. ఇదే సమయంలో స్వదేశీ ఉత్పత్తులు, సేవలకు ప్రాధాన్యం ఇవ్వాలని, విదేశీ పర్యటనలు, డెస్టినేషన్‌ వెడ్డింగ్స్‌ వంటి విదేశీ ఖర్చులను తగ్గించి దేశీయ ఆర్థిక వ్యవస్థకు తోడ్పడాలని ప్రధాని పిలుపునిచ్చారు.

తాజా అధికారిక గణాంకాల ప్రకారం తొలి త్రైమాసికంలో తయారీ రంగం 9.2 శాతం, సేవల రంగం 10 శాతం వృద్ధిని నమోదు చేశాయి. రియల్‌ జీడీపీ 7.8 శాతం, స్థూల విలువ వృద్ధి (GVA) 8.2 శాతంగా నమోదైంది. బలమైన దేశీయ వినియోగం, పెట్టుబడులు, తయారీ, సేవల రంగాల వృద్ధి ఆర్థిక వ్యవస్థకు మద్దతుగా నిలిచాయి. ఈ ఫలితాలు ప్రస్తుత ఆర్థిక సంవత్సరంపై అంచనాలను మరింత సానుకూలంగా మార్చే అవకాశం ఉందని ఆర్థిక నిపుణులు భావిస్తున్నారు.